Абай облысының Бородулиха ауданында шыққан орман өртін сөндіру жұмыстары жалғасуда. Өрт ошағындағы ахуалды бақылау үшін оқиға орнына облыс әкімі Берік Уәли барып, тікұшақпен әуеден жағдайды бағалады.
Өртті ауыздықтауға Қазақстан Республикасы Төтенше жағдайлар министрлігі, Экология және табиғи ресурстар министрлігі, Ішкі істер министрлігі, Қорғаныс министрлігі, Ұлттық қауіпсіздік комитеті және жергілікті атқарушы органдардың күштері жұмылдырылған.
Қазіргі таңда өртті сөндіруге 600 адам, 148 техника және 7 тікұшақ тартылған. Мамандардың үйлесімді жұмысының нәтижесінде Қамышенка ауылына төнген қауіптің беті қайтарылды.
Жағдайды үйлестіру үшін ҚР ТЖМ Жедел басқару орталығының базасында арнайы жедел штаб құрылған. Авиация көмегімен өрт ошақтарына 81 рет су төгіліп, жалпы 89 тонна су шашылды.
Өртті сөндіру жұмыстарына Абай, Шығыс Қазақстан, Павлодар облыстары мен Астана қаласынан келген ТЖМ бөлімшелері, «Семей орманы» мемлекеттік орман табиғи резерваты, «Ертіс орманы» орман шаруашылығы және ТЖМ әскери бөлімінің жеке құрамы қатысуда.
Облыс әкімі Берік Уәли өрт толық сөндірілгенге дейін жағдайдың жеке бақылауында болатынын айтып, жауапты қызметтерге нақты тапсырмалар жүктеді.
«Ең бастысы – адамдардың өмірі мен қауіпсіздігі. Облыстағы барлық техниканы жұмылдырып жатырмыз. Басқа облыстардан да техникалар көмекке келіп жатыр. Жағдай тікелей бақылауымда болады», – деді облыс әкімі.
