Абай облысының әкімі Берік Уәли Семей қаласындағы теміржол вокзалын қайта жаңғырту жұмыстарының барысын барып көрді. Өңір басшысы құрылыс алаңындағы атқарылып жатқан жұмыстармен танысып, жобаның сапалы әрі белгіленген мерзімде аяқталуын тапсырды.
1915 жылы салынған Семей теміржол вокзалы бұған дейін 1972 жылы қайта жаңғыртылып, 2013 жылы күрделі жөндеуден өткен. Қазіргі жаңғырту аяқталған соң вокзалдың жалпы аумағы 3 мыңнан 4,7 мың шаршы метрге дейін кеңейеді. Сонымен қатар ұзындығы 143 метр болатын жаңа жаяу жүргіншілер өткелі салынады.
Қазіргі таңда құрылыс жұмыстары екі ауысыммен жүргізілуде. Жөндеу кезеңінде жолаушыларға қолайлы жағдай жасау мақсатында вокзал ғимаратының жанынан уақытша күту орны ұйымдастырылған.
Облыс әкімі Семей вокзалының өңір үшін маңызды көлік нысаны екенін атап өтіп, құрылыс сапасы мен жұмыс кестесінің қатаң бақылауда болуын тапсырды.
«Президенттің тапсырмасына сәйкес облысымызда теміржол вокзалдарын жаңғырту жұмыстары жүргізіліп жатыр. Бұл – жолаушыларға қолайлы әрі қауіпсіз жағдай жасауға бағытталған маңызды бастама. Өңіріміздегі жаңғырту жоспарына енген 10 вокзалдың ішіндегі ең үлкені – Семей вокзалы. Нысандағы құрылыс барысын үнемі келіп, қадағалап отырамыз. Белгіленген мерзімге сай, уақтылы аяқтауымыз қажет», – деді Берік Уәли.
Мемлекет басшысы Қасым-Жомарт Тоқаевтың тапсырмасына сәйкес «Қазақстан темір жолы» ұлттық компаниясының вокзал инфрақұрылымын жаңғырту бағдарламасы аясында еліміз бойынша 124 теміржол вокзалын жаңарту жұмыстары қолға алынған. Абай облысында жуырда Бородулиха ауданындағы Ауыл және Белағаш ауылдарының теміржол вокзалдары қайта жаңғыртудан кейін республикада алғашқылардың бірі болып пайдалануға берілді.
Қазіргі уақытта өңірдегі сегіз теміржол вокзалында – Семей, Аягөз, Шар, Ақтоғай, Жалаңашкөл, Дегелең, Үшбиік және Жарма станцияларында жаңғырту жұмыстары жалғасып жатыр.
