Абай облысының әкімі Берік Уәли Семей қаласындағы бірқатар сауда нысандарын аралап, үш ай бұрын берген тапсырмаларының орындалу барысын тексерді.
Алдымен аймақ басшысы 1985 жылы салынған «Нива» сауда үйіне барды. Қазіргі таңда мұнда күрделі жөндеу жұмыстары қарқынды жүріп жатыр. Ішкі әрлеу толық аяқталып, электр желілері жаңартылған. Сондай-ақ баспалдақ алаңы бөлшектеліп, сауда залының төбе жабыны ауыстырылған. Сауда үйінің айналасындағы заңсыз орнатылған павильондар да алынып тасталған.
Мердігерлердің мәліметінше, ғимараттың қасбетін әрлеу және сырлау жұмыстары шілде айының соңына дейін аяқталады. Кіреберіс есіктері орнатылғаннан кейін баспалдақтарды жөндеу жұмыстары тәмамдалып, сауда үйін тамыз айында пайдалануға беру жоспарланып отыр.
Одан кейін облыс әкімі «Жансая» базарына барып, жаңғырту жұмыстарының барысымен танысты. Қазір мұнда ғимараттың сыртқы келбетін жаңарту және оған іргелес аумақты абаттандыру жұмыстары жүргізілуде. Мамандар кіреберіс бөлігі мен қасбетін әрлеумен айналысып жатыр. Барлық жұмыстарды қыркүйек айында аяқтау көзделген.
Берік Уәли сауда нысандарының басшылары мен қала әкімдігіне жөндеу және абаттандыру жұмыстарын белгіленген мерзімде әрі сапалы аяқтауды тапсырды.
– Үш ай бұрын бұл нысандарға арнайы келіп, сауда орындарының заман талабына сай болуы керектігін айтып, анықталған кемшіліктерді қысқа мерзімде жоюды тапсырған болатынмын. Қазір жобалар келісіліп, қалпына келтіру жұмыстары белсенді жүргізіліп жатыр. Тұрғындар үшін мұндай нысандардың заманауи әрі қолайлы болғаны маңызды. Сондықтан басталған жұмыстар уақытында және сапалы аяқталуы тиіс, – деді облыс әкімі.
Жаңғырту жұмыстары қала тұрғындарының да оң бағасына ие болды. Олардың айтуынша, сауда орындарының жаңа келбеті кәсіпкерлер мен келушілер үшін қолайлы жағдай қалыптастырады.
