Семейде Абай күніне орай жаңа қоғамдық-мәдени кеңістік – Рәміздер алаңы пайдалануға берілді. Нысан Мемлекет басшысы Қасым-Жомарт Тоқаевтың қолдауымен жүзеге асып жатқан «Абайға құрмет» акциясы аясында салынған алғашқы нысан болды.
Салтанатты ашылу рәсіміне Абай облысының әкімі Берік Уәли, Солтүстік Қазақстан облысы әкімінің орынбасары Нұрлан Кеңесов және қала тұрғындары қатысты.
Берік Уәли өз сөзінде жаңа алаңның ашылуы өңіраралық ынтымақтастық пен ел бірлігінің маңызды белгісі екенін атап өтті. Сондай-ақ ол Рәміздер алаңын салуға қолдау көрсеткен Солтүстік Қазақстан облысының тұрғындары мен өңір басшылығына алғыс білдірді.
«Бұл – акция аясында пайдалануға беріліп отырған алғашқы нысан. Рәміздер алаңы небары алты айға жетпейтін уақытта Бейбітшілік аралында бой көтерді. Енді мұнда мемлекеттік ту көтеру секілді ресми әрі мәртебелі шаралар тұрақты түрде өтетін болады», – деді облыс әкімі.
Жаңа алаң Бейбітшілік (Түйемойнақ) аралында орналасқан. Оның жалпы аумағы 2 гектарды құрайды. Дөңгелек пішінде жобаланған нысанның диаметрі – 28 метр.
Алаң композициясының негізгі бөлігі – биіктігі 35 метрлік Мемлекеттік Ту тұғыры. Ал Мемлекеттік Елтаңба мен Әнұран мәтіні 10 метр биіктікте орналасқан. Мұнда жаяу жүргіншілерге арналған кеңістік, демалыс орындары, орындықтар мен көгалдандырылған гүлзарлар қарастырылған.
Бейбітшілік аралының тарихы да ерекше. Мұнда ядролық сынақтардың тоқтатылуына орай биіктігі 20 метрлік «Өлімнен де күшті» монументі және полигонның жабылғанына 20 жыл толуына байланысты 25 метрлік Бейбітшілік стэлласы тұрғызылған. Биыл аталған нысандарға күрделі жөндеу жүргізіліп, аумағы абаттандырылды.
Алдағы уақытта аралда Президенттің тапсырмасына сәйкес тұрғындарға арналған 56 гектарлық Экологиялық саябақ салу жоспарланып отыр.
Солтүстік Қазақстан облысы әкімінің орынбасары Нұрлан Кеңесов өңір басшысы Ғауез Нұрмұхамбетовтің құттықтауын жеткізді. Оның айтуынша, Рәміздер алаңы – екі өңір арасындағы достық пен бүкіл елдің бірлігін білдіретін нысан.
Шара барысында алаңның құрылысына үлес қосқан азаматтарға Абай облысы және Солтүстік Қазақстан облысы әкімдерінің Алғыс хаттары табысталды. Сонымен қатар әншілер Ибрагим Ескендір мен Қуандық Рахым патриоттық әндер орындады.
«Абайға құрмет» акциясы аясында Семейде басқа да ірі жобалар жүзеге асырылып жатыр. Жаңа әкімшілік-іскерлік орталықта Маңғыстау облысының сыйлығы – Достық үйі, Шымкенттің тартуы – шығармашылық орталық, Алматының сыйлығы – медиаорталық және Павлодар облысының тартуы – үстел теннисі орталығы салынып жатыр.
Сонымен бірге қаланың сол жағалауында Ақтөбе облысының сыйлығы – Жекпе-жек сарайының құрылысы басталды. Түркістан облысы көрме орталығын, Қызылорда облысы «Анаға тағзым» ғимаратын, Атырау облысы «Абай әлемі» орталығын, Жетісу облысы қала қақпасын, Батыс Қазақстан облысы спорт кешенін, Қостанай облысы руханият орталығын салуды жоспарлап отыр.
Астана қаласы Семейде 1500 орындық «Келешек» мектебін салуға ниетті болса, Шығыс Қазақстан облысы Ертіс жағалауын абаттандырмақ.
Акцияға ірі компаниялар мен қоғамдық қорлар да атсалысуда. «KAZ Minerals» жаңа шағын ауданда үлкен стадионның құрылысын бастап кетті. Жеке қоғамдық қор қаражатына 5 мың адамға арналған мешіттің іргетасы қаланды. «Самұрық-Қазына» Мирный кентінде дене шынықтыру-сауықтыру кешенін салып жатыр.
Алдағы уақытта Семейде «Қазақстан халқына» қорының Инклюзивті спорт орталығы мен «ҚазМұнайГаз» ұлттық компаниясының Болашақ сарайы бой көтермек.
