Қазақстан Республикасы Мемлекеттік қызмет істері агенттігінің Абай облысы бойынша департаменті 2026 жылдың бірінші жартыжылдығында мемлекеттік көрсетілетін қызметтердің сапасын бақылау бағыты бойынша атқарылған жұмыстардың қорытындысын шығарды.
Департаменттің бұл бағыттағы негізгі міндеттері – мемлекеттік көрсетілетін қызметтер саласындағы заңнаманың сақталуын қамтамасыз ету, құқық бұзушылықтардың алдын алу және анықтау, сондай-ақ азаматтардың бұзылған құқықтарын қорғау және қалпына келтіру.
2026 жылдың бірінші жартыжылдығында Департамент тарапынан 12 бақылау іс-шарасы жүргізілді. Оның ішінде 7 жоспарлы және 5 жоспардан тыс тексеру өткізілді.
Жүргізілген бақылау іс-шараларының нәтижесінде мемлекеттік көрсетілетін қызметтер саласындағы заңнама талаптарының 12 165 рет бұзылғаны анықталды. Оның ішінде:
- 8 – мемлекеттік көрсетілетін қызметтерді көрсету тәртібін бұзу;
- 36 – мемлекеттік көрсетілетін қызметтерді көрсетуден негізсіз бас тарту;
- 1 516 – қызмет көрсету мерзімдерін бұзу;
- 10 605 – өзге де бұзушылықтар.
Тексеру қорытындысы бойынша 5 қызмет алушының құқықтары қалпына келтірілді. Атап айтқанда, тексеру нәтижесінде азаматтардың біріне жер учаскесіне сәйкестендіру құжаты берілді.
Сонымен қатар, бақылау іс-шараларын жүргізбей-ақ тағы 2 қызмет алушының құқықтары қалпына келтірілді. Оларға жер учаскелерін жалдау мерзімдері ұзартылды.
Мемлекеттік бақылаудың тиімділігін арттыру мақсатында Департамент заманауи құралдарды, оның ішінде қызмет көрсетушілердің ақпараттық жүйелері арқылы қашықтан мониторинг жүргізу тетігін белсенді қолданады.
2026 жылдың бірінші жартыжылдығында қашықтан мониторинг жүргізу барысында мемлекеттік көрсетілетін қызметтер саласындағы заңнама талаптарының 2 800-ден астам бұзушылығы анықталды.
Қабылданған шаралардың нәтижесінде 152 өтініш берушінің құқықтары қалпына келтіріліп, оларға жер пайдалану құқықтары берілді.
Цифрлық бақылау құралдарын пайдалану заң бұзушылықтарды ерте кезеңде анықтап, азаматтардың бұзылған құқықтарын жедел қалпына келтіру бойынша тиісті шаралар қабылдауға мүмкіндік береді.
Жүргізілген тексерулердің қорытындысы бойынша қызмет көрсетушілерге 41 ұсыным беріліп, олардың барлығы толық орындалды.
Жол берілген заң бұзушылықтар үшін 9 қызметкер тәртіптік жауапкершілікке тартылды.
Бұдан бөлек, 3 тұлғаға қатысты Қазақстан Республикасының Әкімшілік құқық бұзушылық туралы кодексінің 465-бабы бойынша 5 әкімшілік құқық бұзушылық туралы хаттама толтырылды.
Қазақстан Республикасы Мемлекеттік қызмет істері агенттігінің Абай облысы бойынша департаменті мемлекеттік көрсетілетін қызметтердің сапасын арттыру, бақылау тетіктерін жетілдіру, заң бұзушылықтарды уақтылы анықтау және жою, сондай-ақ азаматтардың құқықтарын қорғау мен қалпына келтіру бағытындағы жұмыстарды одан әрі жалғастырады.
Қазақстан Республикасы Мемлекеттік қызмет істері агенттігінің
Абай облысы бойынша департаменті
