XXI ғасыр – жаңа ғасыр, дамыған, жастары жетілген ғасыр. Мағжан сенген жастардың мағыналы өмір сүруі қоғам үшін қашан да маңызды. Осы ретте жастық күш – жігерін, білімін өз ортасында тиімді пайдаланып, қоғамның әр саласының дамуына титтей де болса үлес қосып жүрген жалынды жастар баршылық бізде. Ал осындай жастарды қолдауда мемлекет те аянып қалып отырған жоқ. Түрлі салада үздік шыққандарды бағалап, қатарластарына үлгі қылады. Бұл үрдіс бізде де қалыптасқан. Қалалық Мәдениет сарайында өткен Жастар форумында түрлі салада жемісті һәм жеңісті қызмет етіп жүрген жастардың 7 аталым бойынша марапатталуы осы сөзіміздің айғағындай.
Мұндай шараны ұйымдастыру Семейде дәстүрге айналған. Ондағы негізгі мақсат — жастарды өздері таңдаған бағытқа ынталандыру, жігерлендіру әрі абыройын арттыру, жастар арасында мемлекеттік жастар саясатын және патриоттық тәрбие беруді жүзеге асыру. Сондай-ақ кәсіби және қоғамдық жұмыста өзін-өзі көрсете білген, ғылым, өнер және қызметтің басқа да салаларында айтарлықтай жетістіктерге жеткен жас азаматтарды ынталандыру, жастар саясаты мен азаматтық қоғам қалыптастыруда өзіндік үлес қосқан көшбасшылар мен үкіметтік емес ұйымдар жетекшілерінің қоғам алдында беделін көтеру мен абыройын арттыру. Жалпы, жыл санап бұл шараға қатысуға белсенділік танытқан жастардың қатары көбейіп келе жатқанын айта кетуіміз керек.
{jcomments on}Сайыс бойынша қазылар алқасының шешімімен, «Үздік студент көшбасшысы», «Үздік жас кәсіпкер», «Үздік ерікті» сынды түрлі саланы дамытуға атсалысқан белсенділерге арнайы сыйлықтар табысталды. Олардың арасында «Қазақстан-Семей» телеарнасының тілшісі, әріптесіміз Ермек Исабаев та бар. Жергілікті арнада қызмет ететін жас журналист өңірдің дамуы мен әлеуметтік-экономикалық мәселелеріне қатысты өзекті тақырыптарды қозғаған. Бұған дейін де тілшінің авторлығымен жасалған түрлі телебағдарламалары көрермен көңілінен шығып, байқауларда топ жарған.
— «Жас журналист» аталымы бойынша биыл жүлдеге ілігіп отырмын. Менің ойымша, жастарды қолдау әр кезде қажет. Өйткені, Елбасының өзі айтқандай, «келешек жастардың қолында». Енді бүгінгі жүлдеге іліккен жастарға қарап келешек өскелең ұрпақ үлгі алады деген ойдамын, — дейді журналист Ермек Исабаев.
Шыны керек, қазір үйлене салып, ажырасатын жастар көп. Байыбына бармай, тереңіне үңілмей, «теңімді таптым» деп той жасап, жыл салмай аралары суып жатады. Бұл, әлбетте, қоғам үшін қауіпті құбылыс. Бұл ретте түтіні түзу ұшқан, болашаққа жоспарлаған бағыты бір, таным – түсінігі бір арнаға тоғысатын жас отбасылардың өмірін үлгі етуіміз керек. Осындай үлгі аларлық, қызығарлық жас отбасылардың қатарына Кәрібжановтардың отбасын жатқызуға болады. «Жас отбасы» номинациясын иеленген Самат – Альмира Кәрібжановтар бүгінде Жанасыл есімді ұл тәрбиелеп отыр.
— Бұл біздің отбасымыз үшін үлкен жауапкершілік жүктейді. Әділ қазылар үздік деп таныпты. Біздің отбасында ұрпақ тәрбиесіне мән беріледі. Отбасы деген ұғымның ауқымы кең. «Отан отбасынан басталады» деген қазақтың ұрпағымыз ғой. Еліміздің іргетастының мықты болуы жас отбасылардың тату – тәтті өмірімен етене байланысты деп ойлаймын,- дейді Самат Кәрібжанов.
Осылайша, үміткерлерді іріктеу жөніндегі байқау комиссиясы ұсынысы бойынша, 7 жас өз салаларында «Үздік» деп танылды. Жеңімпаздарға қала әкімінің атынан диплом, бағалы сыйлықтар табыс етілді.
Ерзат ЖАНАТҰЛЫ,«Семей таңы»
