1 қазан – Халықаралық қарттар күніне орай Семей қаласында «Қарттарға құрмет – ұрпаққа міндет» атты салтанатты қабылдау өтті. Жиынға Абай облысының әкімі Берік Уәли мен өңірдің қала-аудандарынан келген ардагерлер қатысты.
Аймақ басшысы қарияларды мерекемен құттықтап, олардың ел дамуына қосқан үлесі мен кейінгі ұрпаққа берер өнегесінің маңызын атап өтті.
«Қарты бар үйдің қазынасы бар» деген қазақтың қанатты сөзі бар. Үлкенді сыйлап, ақсақалды төрге шығарып, ақ жаулықты ананы ардақтау – халқымыздың ежелден келе жатқан дәстүрі. Бүгінгі кездесудің «Қарттарға құрмет – ұрпаққа міндет» деп аталуы да осы құндылықты айшықтайды. Ардагерлердің өмірлік тәжірибесі мен елге сіңірген еңбегі кейінгі буын үшін баға жетпес қазына», – деді Берік Уәли.
Шара барысында өңірдің түрлі салаларында ұзақ жылдар еңбек еткен бірқатар ардагер марапатталды. Оларға «Абай облысына сіңірген еңбегі үшін» төсбелгісі, облыс әкімінің Алғыс хаты, республикалық Ардагерлер ұйымының «Құрмет» төсбелгісі мен Алғыс хаттары табысталды.
Жылы атмосферада өткен кездесуде қариялар елдің береке-бірлігі мен жастардың болашағына қатысты ой-пікірлерін ортаға салды.
Абай облысында ардагерлерді әлеуметтік қолдау бағытындағы жұмыстар да жалғасып келеді. Биыл Ұлы Отан соғысының ардагеріне 5 миллион теңге көлемінде біржолғы әлеуметтік көмек көрсетілсе, Жеңіс күні қарсаңында 1 146 адамға 158 мың теңгеден әлеуметтік төлем берілген.
Қазіргі таңда өңірде 2 639 зейнеткер арнайы әлеуметтік қызметтермен қамтылған. Сонымен қатар облыста 395 бастауыш ардагерлер ұйымы, 2 қалалық және 10 аудандық ардагерлер кеңесі жұмыс істейді.
Қарттардың белсенді өмір салтын жалғастыруына да мүмкіндік жасалған. Өңірде 2 «Белсенді ұзақ өмір сүру орталығы» жұмыс істейді. Биыл олардың қатарына Курчатов қаласында ашылған жаңа орталық қосылды. Семейдегі орталықтың 3 филиалы бар. Қазір бұл орталықтарда 608 зейнеткер түрлі қызметтермен қамтылып отыр.
