Өткен жексенбі күні Семей қаласында Сабантой мерекесі тойланды. Түйемойнақ аралында өткен мереке Қазақстан халқы Ассамблеясының 20 жылдығына, сондай-ақ татар қоғамдық орталығының құрылғанына 25 жыл толуына арналды.
Жалпы, татар халқының ұлттық мерекесі Сабантой қаламызда тұрып жатқан түрлі ұлт өкілдерінің басын біріктіретін дәстүрлі мейрамға айналған. Мереке татар халқының көп жылдық дәстүрлерімен таныстырып, ұлт достығын нығайта түсуде. Сабантой мерекесінің салтанатты ашылуында сөз сөйлеген Семей қаласының әкімі Айбек Кәрімов көп ұлтты елімізде ұлттардың достығы мен қарым-қатынасын сақтап, түрлі ұлт өкілдерінің бірлікте, ынтымақта өмір сүруіне барынша жағдай жасалып отырғанын атап өтті.
{jcomments on}- Қадірменді жерлестер, құрметті қаламыздың қонақтары. Біздің еліміз Қазақстандағы барлық ұлттардың, барлық ұлыстардың басын қосып, бүгінгі күні қазақ жерін өзінің ежелгі мекеніндей, туған еліндей көріп, әрқашан да өз тойларын бізбен бірге тойлап жатқаны — ол қазақ халқының кеңпейілділігі. Бұл — барлық ұлттарды бауырына тартқан көңілі көлдей қазақ халқының жеткен жетістігі. Бүгін ынтымағы жарас- қан біздің өлкеміз Сабантой мерекесін кезекті рет атап өтуде. Халқымызды бейбітшілік пен достыққа, береке-бірлікке, салт-дәстүрін ұлықтауға шақыратын бұл мейрамның, барлық ұлттардың мерекелері сияқты, біз үшін алатын орны ерекше. Сондықтан да баршаларыңызды Сабантой мерекесінің ашылуымен құттықтауға рұқсат етіңіздер, — деді қала әкімі.
Екінші кезекте сөз алған Ресей Федерациясының Өскемен қаласындағы Бас Консулдығының атташесі Айрат Хамидулин Консулдық атынан барша татар халқын ұлттық мерекемен құттықтап, мерекені жоғары деңгейде ұйымдастырылғанына ризашылығын білдірді.
— Сабантой мерекесі татар қоғамдық орталығы құрылғаннан бастап дәстүрлі түрде жыл сайын аталып өтіп келе жатыр, — дейді Семей қаласының Құрметті азаматы, татар қоғамдық орталығын қалыптастырушы Ғабдулғазиз Ахмеров мейрамның ашылу салтанатында. — Сабантой — отбасылық мереке. Сабантой тек татар халқының ғана мерекесі емес. Ол барша ұлттардың басын қосып, халыққа қуаныш сыйлайды. Ең бастысы, халықтар арасында достық пен өзара түсіністікті қалыптастырады.
Айтулы шарада татар халқынан өзге қала тұрғындарының да қарасы қалың болды. Сондай-ақ Татарстан Республикасынан арнайы қонақтар келді. Ал мерекелік бағдарлама аясында Татарстан әртістері концерт қойып, облыс және қаланың шығармашылық ұжымдары өз өнерлерін паш етті. Сондай-ақ әншілер, бишілер және ұлттық киімдер сайыстары өткізілді. Мерекенің көркін кіргізетін татар халқының ұлттық ойындары — татар күресі, арқан тарту, гір көтеру, қол күрес және тағы да басқа көптеген спорттық ойындар ойналды.
Мереке аясында татар ұлтының тұрмысы мен дәстүрінен сыр шертетін көрме де ұйымдастырылды. Сабантойға келген қалалықтар татар ұлтының ұлттық тағамдарынан дәм татып, көркемөнерпаздар концерті мен фотокөрмені тамашалап, ойындарға қатысты. Сабантой татар ұлттық өнерінің концертімен қорытындыланды.
Асан МЫРЗАХАНОВ, «Семей таңы»
