Семейде Ұлттық бірыңғай тестілеу қорытындысы шығарылды. Ағымдағы жылы ҰБТ шаһарымызда екі пунктте, атап айтқанда Семей қаласындағы Шәкәрім мемлекеттік университетінде және Қазақ инновациялық гуманитарлық—заң университетінде өткен болатын. Осыған орай қалалық білім бөлімінің басшысы Наталья Фесенко, қалалық білім бөлімі басшысының орынбасары Наталья Тегай және мекеменің жетекші мамандары баспасөз жиынын өткізіп, биылғы сынақтың қорытындыларын шығарды.
{jcomments on}Семей қалалық білім бөлімінің ақпаратына сәйкес, биылғы жылы қала мектептерін 1724 оқушы бітіріп, оның тек 1193-і ҰБТ – ға қатысқан. Бұл жалпы түлектердің 69,4 пайызын құрайды.
— Биылғы жылғы орташа бал 76 пайызды құрап отыр. Бұл өткен жылғы көрсеткішпен салыстырғанда екі балға төмен және облыстық көрсеткіштен төрт жарым балға аз. Ең жоғарғы көрсеткішке № 37 мектеп — гимназиясы мен №3, 9 орта мектептердің түлектері қол жеткізіп отыр. Ал өту деңгейі – 50 балдан 334 түлек аса алмаған. «Алтын белгі» белгісіне үміткер 30 оқушының 10-ы өз білімін дәлелдесе, 8 оқушыға небәрі 1 балл жетпей қалды. Ал 15 оқушы үздік аттестатқа лайық екендігін дәлелдей алды, — дейді Наталья Фесенко.
Айта кетуіміз керек, биылғы жылғы жалпы түлектердің ішінде 23 оқушы Халықаралық олимпиадалар мен байқаулардың жүлдегерлері атанған. Сол себепті де ол оқушылар ҰБТ сынағынан өтуден босатылыпты. Өйткені бұл жастар Қазақстан мен шетелдердің жоғарғы оқу орындарының білім гранттарына ие болған. Сонымен қатар 193 түлек емтихандардан босатылған. Себебі олар Ресейдің жоғарғы оқу орындарына түсу үшін сынақ тапсырып қойыпты. Ал қалған оқушылар сынақты дүстүрлі жолмен тапсырған.
Білім бөлімі басшысының айтуынша, ҰБТ қорытындысы бойынша биылғы сынақта ауылдық жерлердің оқушылары айтарлықтай жоғарғы көрсеткішке қол жеткізген. Атап айтсақ, ауылдық жерлердегі мектептерден 92,6 балл көрсеткішті Жарқын ауылының орта мектебі көрсетіпті. Ал қала мектептерінің ішінде Экономикалық лицей, № № 37, 30, 6, 21, 27 және 47 мектептер жоғарғы көрсеткішке ие болған. Ең төмен көрсеткішпен № 25 орта мектебінің оқушылары шыққан.
Баспасөз мәслихатында сала мамандары ҰБТ-ға дайындық жұмыстары оқу жылы бойы жүргізілгенін, алдын ала болжам бойынша өткен жылғы көрсеткішті сақтап қалу көзделгенін атап өтті. Дегенмен нәтиже төмен болып отыр. Бүгінде білім бөлімімен көрсеткішті арттыру мақсатында арнайы бағдарлама әзірленіпті. Ол бойынша алдағы оқу жылында ұстаздар алдымен ата-аналар арасында үлкен жиын өткізуден бастамақ. Жиында ҰБТ нәтижелерін жақсарту жөнінде оқушылардың ата-аналарына түсіндіру жұмыстары жүргізілетін болады.
Баспасөз жиынында сонымен қатар түлектер кешінің өту барысы, мектептердегі жөндеу жұмыстары, алдағы оқу жылында оқулықпен қамтамасыз ету және балалардың жазғы демалыстары туралы сауалдар талқыланды.
Асан МЫРЗАХАНОВ,«Семей таңы»
