Қала аумағына қарасты Ақсай ауданында 320 гектар жер тұрғын үй салу мақсатында тұрғындарға пайдаланылуға берілген еді. Алайда, 2007 жылы мораторий жарияланғандықтан, құжаттарды рәсімдеу уақытша тоқтатылған-ды. Ағымдағы жылдан бастап мемлекеттік жер актілерін дайындау жұмыстары қайтадан қолға алынды. Бұл туралы сәулет және қала құрылысы бөлімінің мамандары мәлім етті. Осыған орай өткен аптада Айбек Кәрімов іргесі жаңадан қаланып жатқан ауданға арнайы барып, болашақ елдімекеннің құрылыс жұмыстарымен танысты.
Аталмыш ауданды жарықпен қамтамасыз ету мақсатында өткен жылдың желтоқсан айынан электр трансформаторларының құрылысы басталған еді. Қазіргі таңда 9 қосалқы және 3 кешенді трансформатор станцияларын орнату бойынша жұмыстар жасалуда. Ал электр жүйесі толығымен келер жылы қолданысқа беріледі деп жоспарлануда. Бұл жұмыстармен «Семейпластком» ЖШС айналысуда. Бүгінгі күні мердігер компания жергілікті және республикалық бюджеттен бөлінген 936 млн. теңгенің 126 млн. теңгесін игеріп үлгерген. Жарық көзінің жалпы қуаты 4819 кВт болмақ.
{jcomments on}Нысан аумағына келген Айбек Мүталапханұлы мердігерлермен кездесіп іс барысымен танысты. Ұсыныс та білдірді.
— Бұл аумақта мектеп пен балабақша міндетті түрде бой көтеруі тиіс. Себебі мыңнан аса тұрғын үйді салу жоспарланып отыр. Келешекте мұнда 3 мыңнан аса шаңырақ түтін түтетуі ықтимал. Сондықтан да сіздерден жұмыс қарқынын үдете түсулеріңізді сұраймыз. Өйткені қолдарында жерге меншік құқығын беретін құжаттары бар азаматтарға тұрғын үйлер құрылысын жүргізуге рұқсат беру басталады. Ал оларда «электр қуатын қайдан аламын?» деген сұрақ туындамауы керек. Трансформаторларыңыз қазақстандық үлгіде болғаны абзал. Қаражат жағынан сіздерге қолдау көрсетеміз. Мейлінше күш жұмылдыруға тырысыңыздар, — деді Айбек Кәрімов.
Сондай-ақ А.Мүталапханұлы сәулет және қала құрылысы бөлімінің мамандарына Ақсай аумағында тұрғызылатын баспаналардың бірқалыпты, жүйелі түрде салынуын қадағалауды тапсырды.
— Болашақ тұрғын үйлер белгілі бір тәртіппен салынғаны ләзім. Мысалы, Волгоград көшесінің бойындағы баспаналар жоспарға сәйкес орналасқан. Дегенмен ол аумақта да жекелеген тұрғындардың үйлерінің құрылыстарын сәулет нормаларына кереғар жүргізгені анықталды. Бұл орайда сіздер мұндай олқылықтарға жол бермес үшін, осы ауданның жұртшылығына түсіндіру жұмыстарын жүргізіңіздер. Сәулет жоспарына қайшы нысандар салынбасын. Соны бақылауда ұстаңыздар. Оларға БАҚ арқылы біз ұсынып отырған жобаларды көрсетіңіздер. Қалалықтардың құрылыс жүргізу мәдениетін қалыптастыру керек,- деді Айбек Кәрімов.
Ал сәулет және қала құрылысы бөлім басшысының міндетін атқарушы Тілек Төлендинов аталмыш ауданнан жер алып, оны 2007 жылға дейін заңдастырып үлгермеген шаһар тұрғындары болса, қалалық әкімдіктің жер қатынастары немесе сәулет бөліміне келіп, қайтадан тіркеуден өтулерін сұрайды. Себебі бүгінде жер алу үшін 8 мыңнан астам халық кезекте тұрған көрінеді. Келмеген жағдайда жер телімдері тізімдегі тұрғындарға үлестіріліп берілуі бек мүмкін. Сондықтан да құжат рәсімдеуде немқұрайлық танытпаған жөн, — дейді Тілек Айтқазыұлы.
Жақсылық СҮЛЕЙМЕН, «Семей таңы»
