Өткен жексенбінің кешінде Семейде қатты дауыл тұрып, салдарынан қалалықтар үшін елеулі шығын орын алған болатын.
14 маусым күні кешкі сағат 18.30 шамасында қалада секундына 35 метр жылдамдықпен соққан қатты дауыл тұрды. Қаланың көп бөлігінде электр желілері үзіліп, тұрғын үйлер мен әлеуметтік нысандардың шатырлары ұшып кеткен. Шаһардың сол жағалауы толықтай жарықсыз қалды. Абырой болғанда, адам шығыны жоқ. Мамандар апаттың зардабын жою жұмыстарына бірден кірісіп кетті. Дауыл тұрған күні Семейге арнайы келген Шығыс Қазақстан облысы әкімінің орынбасары Дмитрий Гариков төтенше жағдайдың алдын алу және жою жөніндегі штаб отырысын өткізді. Ал дүйсенбі күні Дмитрий Гариков пен Айбек Кәрімов орын алған жағдайды баяндап, баспасөз жиынын өткізді. Отырыста алғаш сөз алған Айбек Мүталапханұлы:
— Шығыс Қазақстан облысының әкімі Даниал Ахметовтің тапсырмасы бойынша барлық қызмет өз жұмыстарына шұғыл кірісті. Дауыл тұрған күні түнгі сағат 23.30-да облыс әкімінің орынбасары Дмитрий Гариковтың қатысуымен төтенше жағдай бойынша шұғыл штаб отырысын өткіздік, — деді.
{jcomments on}Келтірілген дерек бойынша, барлық қызметтер түні бойы жұмыс жасаған. Бірінші кезекте басты қажеттілік саналатын электр желілері мен кәріз жүйесі қалпына келтіріліпті.
Қаладағы жоғары кернеулі электр желісінің үзілуі шаһардың көптеген бөлігін жарықсыз қалдырған болатын. Дауыл ұшырған шатыр жабындысы аталмыш желіге құлаған, салдарынан 11 подстанция жұмысын тоқтатыпты. Қалпына келтіру шараларын “Шығыс Қазақстан аймақтық энергетикалық компаниясы” АҚ 11 жедел тобы атқарыпты. Жалпы қала бойынша электр желілерінің үзілуі салдарынан 57 184 абонент жарықсыз қалған. Бұл жалпы абоненттердің 66 пайызын құрайды. Апаттың алдын алуға “Шығыс Қазақстан аймақтық энергетикалық компаниясы” АҚ 16 бірлік техника, 13 апатты жою бригадалары, коммуналдық қызметтерден 17 бірлік техника мен 60 адам жұмылдырылған. Ал ТЖД-нен 18 техника мен 70 адам тартылыпты.
Сондай-ақ бұл күні он адам медициналық көмекке жүгінсе, бүгінде олардың 2-і ғана емханаға жатқызылыпты. Жағдайлары жаман емес. Ал құлаған талдар мен түрлі заттардан 24 автокөлік зардап шеккен. Сонымен қатар бұл күні тоғыз бағдаршам істен шыққан. Олардың бесеуі электр жарығының сөнуінен болса, төртеуі су деңгейінің көтерілуінен жұмысын тоқтатыпты.
— Ең бастысы, адам шығыны орын алған жоқ. Айта кету керек, білім беру нысандарына елеулі түрде залал келді. Шамамен 11 мектептің шатырлары бүлінді. Кейбір білім ордаларының жабындылары 60 пайызға қираған. Бұған Суық бұлақ кентіндегі №48 орта мектепті жатқызуға болады, — деді облыс әкімінің орынбасары.
Дауыл салдарынан сондай-ақ 12 көп қабатты тұрғын үй, 3 мәдени нысаны және 30 шақты жеке сектордағы тұрғын үйлерге нұқсан келген.
Осы орайда Дмитрий Гариков сала басшыларына арнайы мамандандырылған мекемеге жүгініп, залал келген нысандарды бес күннің ішінде анықтауды тапсырды. Бұл жұмыстарға білім, денсаулық, ТҮКШ және тұрғын үй инспекциясының қызметкерлері де тартылып, зардап шеккендерге түсіндіру жұмыстарын жүргізу керектігін атап өтті. Қазір қалада қайта қалпына келтіру жұмыстары жалғасуда.
Асан МЫРЗАХАНОВ, «Семей таңы»
