Шығыс Қазақстан облысының әкімі Даниал Кенжетайұлы Ахметовтің өкімімен төрт жарым жылға жуық уақыт Семей қаласының әкімі болып қызмет атқарған Айбек Мүталапханұлы Кәрімов пен облысымыздағы Зырян ауданының әкімі болып қызмет істеген Ермак Бидахметұлы Сәлімов КАДРЛАРДЫ РОТАЦИЯЛАУ тәртібімен өзара тақ алмастырды.
{jcomments on}Қала активіне жаңа басшыны таныстырған облыс әкімі Даниал Кенжетай-ұлы Семей қаласына қашан да ерекше ықыласпен қарайтынын атап өтті.
– Семейге деген ықыласым ерекше. Семей тарихи – мәдени дәстүрі қалыптасқан, өзіндік орны бар шаһар. Алдымызда қала дамуына тың серпін беру міндеті тұр. Бұл бағытта бірқатар жоспарлар бар. Тәжірибесі мол Ермак Бидахметұлы — білікті басшы. Қалалық әкімдік жаңа әкіммен бірге аймақ әлеуетін барынша арттырады деген сенімдемін, – деді Даниал Ахметов.
Облыс әкімі Семей қаласын төрт жарым жылға жуық басқарған Айбек Кәрімовтің жұмысына оң баға берді.
— Мен Айбек Мүталапханұлының өте қарқынды жұмыс жасағанын қайталап айтқым келеді. Айбек Мүталапханұлы жаңа қызметте де лайықты жұмыс ат-қаратындығына сенімдімін. Семей қаласын басқарған жылдары Айбек Мүталапханұлының басшылық қызметтегі тәжірибесі толыса түсті. Әсіресе аграрлық саладағы тәжірибесі көпке үлгі, — деп атап өтті өңір басшысы.
Қала активі Айбек Кәрімовтің төрт жарым жылдағы атқарған жемісті жұмысына оң бағасын беріп, ыстық ықыластарын жеткізіп, жаңа қызметінде де табысты еңбек етуіне тілектестіктерін білдіріп жатты. Мәселен, Шығыс Қазақстан облысының Құрметті азаматы Маймұрат Уәлиев Айбек Мүталапхан-ұлының Семей қаласының жылуын жүйеге келтірудегі жұмысын ерекше бағалады.
— Осында отырғандардың көбі біраз жыл бұрын Семейдегі үйлердің жылуы қандай жағдайда болғанын жақсы біледі. Сол уақытта әсіресе сол жағалау тұрғындары толықтай жылусыз қалған еді. Мұның себеп — салдары да көп болды. Бұл мәселе республика деңгейіне дейін көтеріліп, жағдайды жылдам шешу тапсырылды. Осы уақытта облыс әкімі шаһарымызға жаңа әкім Айбек Кәрімовті тағайындады. Айбек Мүталапханұлы, қыстың қаһарына қарамастан, жылу жүйелерін жөнге келтіруге барын салды. Міне, осы іскерліктің арқасында соңғы төрт жыл бойы семейліктер жылудан тарыққан емес. Мұны қарапайым тұрғындар жақсы біледі. Айбек Мүталапханұлының бастамасымен қаламыздың Орталық алаңы да тұрғындардың демалатын көрікті жерлерінің біріне айналды. Шаһарды абаттандыру бағытында да көптеген игі істердің атқарылуына мұрындық болды. Осы елеулі еңбегі үшін Айбек Мүталапханұлына зор алғысымызды білдіреміз, — деді Маймұрат Уәлиев.
Жиында сөз сөйлеп, алғыс айтамын деушілер аз болған жоқ. Көптен суырыла шығып сөйлегендердің бірі Гүлжихан Жұматаева болды.
— Семейдің мұсылман әйелдер ұйымының атынан Айбек Мүталапханұлына рақмет айтамын. Соңғы төрт жарым жылдағы Семей қаласына сіңірген еңбегі атап айтуға тұрарлық. Қай салада болмасын жеткен жетістіктер бар. Осы ретте алдағы қызметінде де ел игілігі үшін атқарған еңбегі еселене бергей, — деп Гүлжихан Әмірғалиқызы аналық ақ тілегін жеткізді.
Кездесу соңында Семей қаласының жаңа әкімі Ермак Сәлімов сөз алып, жаңа міндетті абыроймен өтейтінін атап өтті.
— Семей қаласы — ерекше қала, мәдениеттің орталығы. Осындай тарихи шаһарды басқаруға сенім білдіріліп отыр. Бұл мен үшін үлкен жауапкершілік әрі үлкен міндеттер жүктейді. Айбек Мүталапханұлы бастап кеткен жұмыстарды жалғастырып, Семей қаласын өзге қырынан дамытуға күш – жігерімді саламын. Ол үшін алдағы уақытта барлығымыз бірлесе жұмыс атқаратынымызға, ортақ шешім аясында қызмет жасайтынымызға кәміл сенемін, — деп атап өтті Ермак Бидахметұлы.
Ерзат ЖАНАТҰЛЫ,“Семей таңы”
