«Нұр Отан» партиясының Семей қалалық филиалында қала тұрғындары үшін қоғамдық қабылдау болып өтті. Бұл жолғы шараға қалалық Әділет басқармасының басшысы Бейсенбек Әл-Сейіт келіп, қабылдауға жазыл-ған көпшіліктің сауалдарына жауап қайырып, заң қағидалары негізінде тиісті кеңестер берді.
{jcomments on}«Әділет кеңес береді» атты мұндай берері мол шара қаламыз бойынша әр тоқсан сайын өткізіледі. Себебі қазіргі күнгі қолданыстағы заңнамалық өзгерістерге сәйкес жұртшылық арасында ақпараттандыру ісін жүргізудің маңыздылығы зор болып тұр. Атап айтсақ, жылжымайтын мүлікті тіркеу мен заңдастыру, меншік құқығына аудару сынды әрекеттерге байланысты толықтырулар көп. Бұдан өзге кәсіпкерлік ашу, оның құжаттарын рәсімдеу сынды бірқатар күрделі сауалдар жетерлік. Ал осы ретте заң талаптарын білмеудің соңы көп жағдайда әкімшілік жауапкершілікке тартылуға алып келеді екен. Қалалық Әділет басқармасы басшысының айтуынша, мәселен, 2007 жылдан бастап жеке адам немесе заңды тұлға сатып алған жылжымайтын мүлкін 6 айдың ішінде мемлекеттік әділет департаментіне тіркеуден өткізуі міндеттелген. Бұл тарапта жеке тұлғаға, егер ол жылжымайтын мүлкін тіркеуден өткізбесе, 10 айлық есептік көрсеткіш көлемінде айыппұл салынса, заңды тұлғадан 20 айлық көрсеткіш көлемінде айып өндіріледі. Ал дәл осы тәрізді акциялар аясында тұрғындардың құқықтық сауаттылығы біршама артып келеді. Яғни, заң талаптарына жауапкершілікпен қарай бастаған. Атап айтсақ, 2013 жылы жылжымайтын мүлкін тіркетуге салғырттықпен қараған 172 адам әкімшілік жауапкершілікке тартылса, 2014 жылы 121 адам, ал биылғы жылдың алты айы ішінде не бары 38 ғана болып отыр. Демек, үш есеге дейін азайған.
Бұл жолғы қоғамдық қабылдауға жазылған жандардың басым көпшілігі жеке бас құжаттарын рәсімдеу, тұрғын үй кезегіне тұру мәселелерімен келіпті. Өтінішпен келген қала тұрғындарының барлығына Бейсенбек Әл-Сейіт кәсіби тұрғыдан кеңестер беріп, тіпті өз тарапынан да тиісті көмектер көрсетуге әзір екендігін жеткізді.
Жалпы, бұл күні қоғамдық қабылдауға жазылған азаматтардың барлығы жылжымайтын мүлікке құқықтарды тіркеу, құжаттарды рәсімдеу, нотариаттық іс-жүргізу салалары бойынша және басқа да әлеуметтік тақырыптағы сауалдар қойып, өз сұрақтарына тиісті жауап пен заң көмегін ала алды.
Сондай-ақ, қалалық Әділет басқармасының басшысы Бейсенбек Әл-Сейіт өз кабинетінде де тұрғындарды қабылдайтынын айтады.
Қуаныш ЖОЛЫМБЕТ,«Семей таңы»
