11-16 маусым күндері Өскеменде ШҚО әкімінің жүлдесіне арналған ХІХ халықтық спорт ойындары өткен болатын. Нәтижесінде Семей қаласының құрамасы жалпыкомандалық есепте ІІ орынды еншіледі. Осыған орай сейсенбі күні Семей қаласы ақпараттық орталығында қалалық дене шынықтыру және спорт бөлімінің басшысы Мұрат Құржықаев пен ХІХ халықтық спорт ойындарында жүлдегер атанған семейлік спортшылардың қатысуымен баспасөз мәслихаты өтті.
{jcomments on}Биылғы жылы халықтық ойындар бағдарламасына өзгерістер енгізіліпті. Атап айтқанда, баскетбол, асық ату және аламан бәйге жарыс қатарына алынды. Сол сияқты ақ боз үй байқауы да қайтадан жаңғыртылған екен. 13 маусым күні Өскемендегі «Восток» алаңында өткізілген жарыстың ашылу салтанатында 40 адамнан құралған топ Семейдің жалауын желбіретіп, сап түзеп өткен. Жерлестердің арнайы тігілген киім үлгілері өңір басшылығы тарапынан жоғары бағаланған көрінеді. 146 адамнан жасақталған делегация құрамасы 23 ойын түрінен шаһар намысын қорғаған. Оның ішінде жерлестеріміз дойбы, шахмат, тоғызқұмалақ, жорға жарысы және қазақ күресінен ешкімге дес бермей, топ жарған. Ал үстел теннисі, жеңіл атлетика мен 25 шақырымдық аламан бәйгеде семейлік саңлақтарымыз ІІ орынды иеленген. Асық ату мен 3 шақырымдық тай жарысынан, президенттік көпсайыс пен волейболдан ерлер құрамасы қола жүлдеге табан тіреген. Жарыс қорытындысы бойынша қалалар арасында өскемендіктер жеңіс тұғырынан көрінген. ІІ орынды Семей қаласының командасы иеленсе, үздіктер үштігін Зырян қаласы түйіндеген. Ал аудандар арасында Тарбағатай ауданы көш бастаған. Баспасөз мәслихаты барысында қалалық дене шынықтыру және спорт бөлімінің басшысы Мұрат Құржықаев құраманың кемшін тұстарын да атап өтті.
— Өкінішке орай, футбол мен әйелдер арасындағы волейбол жарысынан үмітіміз ақталмады. Аяқдопшылар ІV орынды қанағат тұтты. Іріктеу турнирлерінде волейболдан жақсы өнер көрсеткен қыздар құрамасына бұл жолы VІІІ орын бұйырды. Осылайша өскемендіктерге есе жіберіп алдық. Десек те мұның өзі жаман нәтиже емес. Алдағы уақытта осы олқылықтар негізге алына отырып жұмыс жүргізілетін болады. Жарысқа дайындалу кезінде спортшыларға зор қолдау көрсеткен бірқатар азаматтар мен барлық ұйымдарға алғысымызды білдіреміз,- деді Мұрат Мұрсаханұлы.
Айта кету керек, облыстық турнирде көпшілікпен тең дәрежеде сайысуға мүмкіндігі шектеулі жандар да мүмкіндік алған. Соның ішінде қол күресінен 80 келіге дейінгі салмақта сынға түскен Данияр Тайменов қарымының мықтылығын дәлелдеп, алтыннан алқа таққан. Жалпы, жарысқа 16 мен 60 жас аралығындағы спортшылар қатысқан. Енді үздік шыққан жеңімпаздар мен жүлдегерлерден облыс құрамасы іріктеліп, күз айында «Ақ бидай» республикалық ауыл спорт ойындарында өңір намысын қорғамақ. Сондай-ақ Мұрат Құржықаев өз сөзінде ШҚО әкімінің жүлдесіне арналған келесі жылғы ХХ халықтық спорт ойындары Семейде өткізілуі ықтимал екендігін айтып өтті.
Жақсылық МҰРАТҚАЛИ, «Семей таңы»
