Семей қаласындағы «Семей асбест — цемент бұйымдары зауыты» ЖШС аумағында индустриялық — инновациялық даму мемлекеттік бағдарламасы аясында 100-ге жуық жаңа жұмыс орнын ашуға мүмкіндік беретін жоба іске қосылды.
Семейдегі асбест — цемент бұйымдары зауытында автоклавты газды бетон өндірісі іске қосылды. Зауыттың жылдық қуаттылығы 100 мың текше метр газды бетонды өндіруге жетеді. Бұл жүзге жуық жаңа жұмыс орнын ашуға мүмкіндік берді.
{jcomments on}Аталмыш өнім соңғы кезде қарқын алған тұрғын үй құрылысына пайдалануда өте тиімді болмақ. Өйткені қолжетімді тұрғын үй құрылысына қажетті материал сапалы және арзан болып отыр. Сөзіміз дәлелді болу үшін, тоқтала кетейік. Газды бетонның өлшемі 600х400х200 мм құрайды. Ал оның 200 мм қалыңдығы 75 см қалыңдықтағы кірпіштің орнын басады екен. Сондай-ақ аталмыш газды бетондар кірпіштің құнымен салыстырғанда үш есе арзан. Зауыт басшылығының айтуынша, егер кірпіштің бір текше метрі 46-48 мың теңгенің аралығында болса, газды бетон 16 мың 500 теңгені құрайды. Яғни, үш есе арзан материал алып, шығыныңызды әжептәуір азайта аласыз. Бұған қоса аталмыш газды бетондар жылуды жақсы сақтайды және экологиялық таза саналады. Бірегей жобаны жүзеге асыруға «Даму» желісі бойынша 350 млн. теңге қаражат жұмсалған. Қосымша кәсіпорын басшылығы 100 млн. теңге жұмсаған.
— Жобаны іске асыруды өткен жылдан бері жоспарлап келдік. Бір жылдай инвестиция мәселесімен айналыстық. Осы ретте «Халық банкі» АҚ мен «Даму» қорына өнімнің қажетті екенін дәлелдедік және олардың тарапынан қолдауға ие болдық, — дейді зауыттың бас директоры Сейтқасым Тамбетов.
Бүгінде зауыттың жаңа өніміне Қазақстан бойынша тапсырыстар да түсіп жатқан көрінеді. Семей зауыты басшыларының айтуынша, автоклавты газды бетон өндірісін іске қосу арқылы құрылыс жүргізуді бұрынғыдан жылдамдатуға болады және қаржы мен уақытты үнемдеуге мүмкіндік туады.
— Өнімдерімізге Өскемен, Семей, Павлодар, Талдықорған, Астана қалаларынан тапсырыстар түсуде. Бүгінгі күні сұраныс өте жақсы деп айта аламыз. Соңғы жылдары Семей қаласында да өте жақсы жобалар қолға алына бастады. Құрылыс қарқынды түрде жүргізіліп жатыр. Сондай-ақ «Сәт құрылыс» фирмасы да біздің өнімге тапсырыс беріп отыр. Айта кетуіміз керек, бүгінгі күні көп қабатты үйлердің жобалары көбіне осындай газды бетонға арналып жасалады. Өйткені бұл құрылыс материалының өзіндік ерекшеліктері өте көп, — дейді Сейтқасым Тамбетов.
Семей асбест — цемент бұйымдары зауыты шаһарымыздағы көне кәсіпорындар қатарынан. Негізі, төбе жабындылары (шифер) шығаратын мекеме қазір заман талабына сай жұмыс жасап, қосымша әртүрлі жобаларды қолға алып отыр. Соған сай, зауыт қаланы көркейтуге арналған отызға жуық өнім түрлерін шығарып, ел экономикасының өркендеуіне өз үлестерін қосуда.
Асан МЫРЗАХАНОВ, «Семей таңы»
