Семей қаласының әкімі Ермак Сәлімов Біріккен Ұлттар Ұйымының (БҰҰ) Балалар қорының (ЮНИСЕФ) Қазақстандағы өкілі Юрий Оксамитныйды қабылдады. Мәртебелі мейманның Семей шаһарына келудегі басты мақсаты – ұйымның өңірде атқарылып жатқан жұмыстардың нәтижесімен танысу. Сондай—ақ жергілікті атқарушы билікпен орнаған тығыз әріптестік қарым—қатынасты нығайта түсу.
БҰҰ-ның Балалар қоры Семей өңірінде 2007 жылдан бастап жұмыс жасап келеді. Осы ретте қордың тікелей араласуымен әртүрлі жобалар іске асып, өз нәтижесін де берген болатын. Қазір Балалар қорының биылғы жылға арналған бағдарламалары аяқталуға жақын. Ал тығыз әріптестікті тереңдете түсу үшін келер жылдарға арналған, жаңа бағдарламалар мен жобаларды жүзеге асыру қажет. Бұл орайда Юрий Оксамитный шаһар басшысымен алдағы уақытта бірлесіп атқаратын шараларды ұйымдастыру мақсатында арнайы келгенін жеткізді.
— Алдағы уақытта да біз осы өңірде стратегиялық маңызды сұрақтармен айналысуға ниеттіміз. Оның ішінде ювеналды салаға қатысты мәселелер бар. Сіздердің аймақтарыңыз нәрестелердің өлім-жітім көрсеткішінің азаюы бойынша жақсы нәтижелер көрсетіп отырғанын білеміз. Осы сауалдың төңірегінде өз тәжірибемізбен бөліскіміз келеді. ҚР Президенті Нұрсұлтан Назарбаевтың 5 институционалды реформаны жүзеге асырудағы «100 нақты қадам» бағдарламасымен таныстық. Ел үшін аса маңызы зор аталмыш құжатта біздің зерттеуіміздегі мәселелер қамтылған екен. Біз де өз кезегімізде 2016-2020 жылдарға арналған жобаны әзірлеу үстіндеміз. Онда қоғамның назарын талап ететін әлеуметтік сұрақтарға зейін салмақпыз. Бүгінгі күннің түйткіліне айналған суицид, яғни өз-өзіне қол жұмсау мәселесін де жіті бақылауға алдық. Ол үшін арнайы бағдарлама дайындалды. Әзірге тәжірибе ретінде бұл бағдарламаны Қызылорда облысында іске асырудамыз. ҚР Премьер-Министрінің орынбасары Бердібек Сапарбаевтың да бұл күрмеулі мәселені назардан тыс қалдырмай жүргенінен хабардармыз, — деп атап өтті Юрий Викторович өз сөзінде.
Сондай-ақ қадірлі мейман жуырда ҚР Бас прокуратурасында өткен алқалы кеңес жайлы сөз қозғады. Оған құқық қорғау органдары басшылары, ҚР Білім және ғылым министрлігі мен ҚР Денсаулық сақтау және әлеуметтік даму министрлігінің өкілдері қатысқан екен. Аталмыш кеңесте тұрмыстық және балаларға қатысты зорлық-зомбылық мәселесі талқыға түскен көрінеді. Енді республика көлемінде аталмыш қоғамдық мәселенің түйінін тарқатуда Халық-аралық ұйым да өз үлесін қоспақ ниетте екен. Кездесу барысында БҰҰ Балалар қорының Қазақстандағы өкілі қала әкіміне «Балаға мейірімді қала» жобасын жүзеге асыруға қол ұшын беруін сұрады. Өз кезегінде Ермак Бидахмет-ұлы мұндай игілікті шаралардан шет қалмайтынын, өскелең ұрпақтың болашағы үшін әрдайым көмек көрсетуге әзір екендігін айтты.
— Әрине, қолдау көрсетуге дайынбыз. Кейбір стратегиялық сұрақтарды заң шеңберінде шешуге тура келеді. Балғындардың келешегі үшін аянып қалмаспыз. Осы тақырыптың аясында тиімді мемлекеттік бағдарламалар іске асырылуда. Мұнымен қоса қазір Семейдің демографиялық ахуалы жақсарып келеді. Бұған сіздердің де ұйымдарыңыздың септігі тиді. Сондықтан ары қарай сіздермен бірге тығыз қарым – қатынаста жұмыс атқаратын боламыз,- деді Семей қаласының әкімі Ермак Сәлімов.
Ж. СҮЛЕЙМЕН, «Семей таңы»
