Шығыс Қазақстан облысында алдағы бес жылда жалпы құны 535 млрд. теңгені құрайтын 30 жоба іске асатын болады. Бұл жайында облыстық мәслихат депутаттары алдында есеп беру кезінде ШҚО әкімі Даниал Ахметов мәлім еткен болатын. Аймақ басшысы атап өткендей, басты назар индустрияландыру картасы аясында жобалардың іске асуына және алдағы уақытта өңір өнеркәсібінің дамуына аударылмақ.
{jcomments on}Аталған бағыттардың ішінде ерекше екі жобаға басымдық беріледі. Олар төрт мың жұмыс орнын қамтитын, жалпы құны 113 млрд. теңгені құрайтын «Өскемен қаласындағы толық циклді автомобиль зауыты және автокомпоненттер өндіруші технопарк» және мың жарым жұмыс орнымен қамтамасыз ететін, құны 334 млрд. теңге құрайтын «Ақтоғай тау-кен кешені». Даниал Кенжетайұлы аталған екі ірі жобаның құрылысы 2017 — 2018 жылдарға дейін іске асуы жоспарланып отырғанын жеткізді. Сонымен қатар облыста Риддер тау-кен кешенінде және өзге де кешендерде полиметалл рудаларының жаңа көзін ашып, руда өндірісін дамыту көзделуде.
– Бес айдың ішінде облыс бойынша әлеуметтік — экономикалық даму жағымды көрсеткіштерге жетті. Ағымдағы жылы «Қазмырыш» компаниясы өткен жылмен салыстырғанда, барлық металл түрінің өндірісін ұлғайтуды болжап отыр. Қазіргі таңда геологиялық барлау жұмыстарын республика тарапынан қаржыландыру екі есеге ұлғайды. Кәсіптік құрылымдар белсенді жұмыс жасап жатқанымен, біз қажетті жағдай тудыруымыз керек, – деді Даниал Ахметов.
Сонымен қатар аймақ басшысы ШҚО–ның автокөлік иелері жаңа көліктерге назарын аударғандығын айта отырып, көлік құрылысы саласына тоқталып өтті. Бүгінгі күні халықаралық кеңес беруші «Pricewaterhouse Coopers» (PwC) компаниясымен бірлесіп, автомобиль өндірісін халықаралық деңгейде дамыту жобасы құрылуда. Атап өтетін болсақ, ағымдағы жылдың бес айы ішінде шығысқазақстандықтар 800 — ге жуық көлік алса, «Азия Авто» өндірісінен отандық көліктерді сатып алуға банктерге жеңілдікті несие бойынша бес жарым мың сұраным қарастырылуда.
ШҚО Ақпараттық орталығы.
