Биыл көктем келісімен Семейде маңызы бар автомобиль жолдарында жөндеу жұмыстары жүргізіле бастады. Алдымен аса қажет, көліктер нөпірі көп болып табылатын жолдар жөнделіп, қозғалыс қауіпсіздігі қанағаттандырылған болатын. Бұл жұмыстар жаздың екінші айында жанданып, шаһардағы маңызы бар сегіз көшеге орташа жөндеу жұмыстары басталды.
Семей қалалық тұрғын үй коммуналдық шаруашылығы бөлімінің сектор меңгерушісі Нұрлан Серғазиновтің айтуынша, орташа жөндеу жұмыстарына бөлінген қаражатқа 1 шілдеден бастап байқау жүргізіліп, жеңімпаз болған «Гордорстрой» ЖШС-мен келісім шарт жасалған. Ол бойынша сегіз көшеге жөндеу жұмыстары жүргізіледі. Бүгінде олардың бірқатарында жұмыстар аяқталып та қойыпты.
{jcomments on}Мәселен, Би Боранбай көшесінде орташа жөндеу жұмыстары атқарылған. Сол сияқты Фрунзе көшесінде (Қабанбай батыр көшесінен Найманбаев көшесіне дейін) жұмыстар атқарылыпты. Ал Терешкова көшесі мен Дулатов көшесінде (Жансая базары аумағындағы темір-жол өткелінен Елемесов көшесіне дейін) жөндеу жұ- мыстары аяқталған. Сонымен қатар Гагарин көшесінде екі участок (Интернационал және Қозбағаров аралығы және Шәкәрім даңғылынан Герцен көшесіне дейін) жөндеуден өткен.
— Мұның барлығы орташа жөндеу жұмыстары. Аталған жұмыстарға 62 млн. теңге қаражат бөлінді. Ал жөндеу жұмыстарына тозығы жетіп, қатынауы қиындық туғызған көшелер алынып отыр. Бүгінгі күні Би Боранбай көшесін күрделі жөндеуден өткізу мақсатында жоба жасалуда. Жоба әзірленгенше жол қауіпсіздігін қамтамасыз ету мақсатында орташа жөндеу жұмыстары жүргізілді, — дейді Семей қалалық тұрғын үй коммуналдық шаруашылығы бөлімінің сектор меңгерушісі Нұрлан Серғазинов.
Жолдардың барлығы келісім шарт бойынша тамыз айының соңына дейін аяқталуы тиіс. Алайда мердігер бұл жұмыстарды келісілген мерзімнен ерте аяқтауды жоспарлап отыр. Айта кетуіміз керек, шаһарда тозығы жеткен жолдарды жөндеу үшін қосымша қаражат қарастырылып отыр. Егер қаражат қарастырылатын болса, тағы да 14-17 көшеге орташа жөндеу жұмыстары жүргізілмек. Дегенмен ол уақыт еншісінде.
— Нақты қандай көшелердің жөнелетінін айта алмаймын. Өйткені барлығы бөлінетін қаражатқа байланысты болып отыр. Бұл жұмыстарға 200 млн. теңге қажет. Бұл облыстық бюджет есебінен жүзеге асырылмақ, — дейді бөлім меңгерушісі.
Естеріңізге сала кетейік, көктем шыға қаламызда жол жөндеу жұмыстары жүргізілген болатын. Ағымдағы жұмыс-тармен ол кезде қаланың 32 көшесі қамтамасыз етіліп, барлығы 32 мың шаршы метр болатын аумақ қалыпқа келтірілген еді. Ал бұл жұмыстарға барлығы 100 млн. теңге қаражат бөлінген болатын.
Ал күрделі жөндеу жұмыстары өткен жылы қалада екі көшеде Дальняя көшесі мен Мичурин көшелерінде басталған болатын. Екі жылға жоспарланған бұл жұмыстар биыл аяқталуы тиіс. Дегенмен қаражат мәселесі алдағы сессия мәслихатында шешімін таппақ. Бүгінде Мичурин көшесіндегі жұмыстарды аяқтау үшін 700 млн. теңге, Дальняя көшесіне 155 млн. теңге қосымша қаражат керек. Өткен жылғы жұмыстардың барлығы жергілікті бюджет есебінен жүргізілген еді.
А. САМАТҰЛЫ, «Семей таңы»
