Ұлт денсаулығы мемлекеттік саясаттың маңызды басымдықтарының бірі болып табылады. Осы орайда әрдайым мемлекет отандық дәрі—дәрмек өндірісіне мән беріп, дәрілік заттар өндірісінің дамуына көңіл бөлуде. Ал бұл фармацевтика саласының ілгерлеуіне оң ықпалын тигізді. Әрине, бұл бірінші кезекте қарапайым халықтың дертіне шипа болатын отандық өнімді пайдалануға мүмкіндік туғызуда. Осындай дәрі—дәрмек өндірісін қолға алған кәсіп—орындардың бірі Семейде орналасқан.
Қазақстандағы ең беделді компаниялардың бірі саналатын — «РОМАТ» фармацевтикалық кәсіпорыны Семейде 1992 жылдан бері қарай әлемдік талаптарға сай өнім шығарып келеді. Компания қазіргі заманға сай құрал-жабдықтармен толықтай қамтамасыз етіл-ген. Таблетка және капсула түріндегі дәрі — дәрмектермен қатар, шөптен жасалған препараттарды да өндірумен айналысады.
{jcomments on}Алғашқы жылдары көтерме — бөлшек фирма ретінде іргесін көтерген компания қазіргі уақытта өзінің сауда маркасына дәрі — дәрмектер, биопрепараттар мен полимерлі медициналық бұйымдарды өндіріп, ұлттық дистрибьютерлік желі мен дәріханалардың бөлшектік желісін біріктіретін ірі фармацевтикалық холдингке айналды. Кәсіпорынның негізгі мақсаты – отандық нарықты жоғары сапалы фармацевтикалық дәрі-дәрмектермен және осындай тауарлардың кең түрімен уақтылы және сапалы қамтамасыз ету.
— Әлемдік сапа стандартына сәйкес келетін өнім шығаратын компания дәрі-дәрмектерді таблетка және капсула, инфузиялық ерітінділер, галеналық — бөлшектеп өлшеу өнімдері және ферменттік препараттар түрінде шығарады. «Ромат» компаниясының медициналық бұйымдар зауыты — Қазақстандағы бір жолғы пайдаланатын үш құрамды шприцтер шығаратын жалғыз зауыт. Өнімінің құрамына көпшілігі өмірге қажетті және әлеуметтік маңызы бар дәрі-дәрмектердің 100-ден астам түрі бар, — дейді «Ромат» фармацевтикалық кәсіпорынының өндіріс бойынша директоры Зәуре Әбеуова.
«Ромат» компаниясы – өз қызметін Қазақстанның барлық аумағында жүзеге асыратын ұлттық деңгейдегі дистрибьютор. Компанияның өңірлік желісінде еліміздің барлық ірі қалаларында филиалдары және Бейжіңде (Қытай) өкілдігі ашылған екен. Медициналық препараттар шығаратын зауыт бүгінгі таңда 100 шақты фармацевтикалық өнім түрін шығаратыны аталып өтілді. Соның ішінде «Ромат» гемотагені – зауыттың брендтік маркасы. Өндірістің қуаты жылына 9 млн. гемотаген плиткаларын жасауға мүмкіндік туғызуда. Ал гемотагенге қажетті дәрілік шөптер Шығыс Қазақстанның Алтай аймағынан алынады екен. Семей қаласында орналасқан бұл медициналық орталық — «Ромат» компаниясының ең ірі емдік сипаттағы орны. Алдағы уақытта жоғарғы технология құрылғыларын меңгеріп, аталмыш өнім түрін екі есеге арттыру көзделуде. Оған сәйкес өнім түрлері де арта түспек.
Өндіріс орнының жеткен жетістігі де аз емес. Кәсіпорынның өндіріс бойынша директоры Зәуре Әбеуованың айтуынша, «Ромат» компаниясы «Қазақстандағы № 1 дәрі-дәрмек заттарын өндіруші» номинациясы бойынша «жыл таңдауы» конкурсының алтыншы рет жеңімпазы болып табылады. Осы марапаттаулар жоғары сапалы марка ретінде «Роматтың» жоғары мәртебесін растайды. 2002 жылдың сәуірінде Еуропалық Парламентте (Брюссель) «Ромат» компаниясына жоғары дәрежелі марапат ұсынылыпты. Бұл марапатқа өз саласында үлкен жетістіктерге жеткен, экономиканың дамуына және бәсекеге қабілетті тауарлар мен қызметтер шығаруға үлес қосқан жетекші фирмалар ғана ұсынылаатынын айта кетуіміз керек. Ал 2006 жылдың қазанында компания тағы да бір жоғары дәрежелі марапат алуға ұсынылды. Ол — «2006 жылғы Ұлттық Экономика Көшбасшысы» Құрмет белгісі. Бұл компанияның беделін арттырып, өнімнің сапасын растады және кәсіпорынның белсенді өсуіне оң ықпал ететін инновацияларды меңгеруге күш берді.
Асан МЫРЗАХАНОВ,
«Семей таңы»
