Облыстық прокуратура мен ішкі істер органдары қызметкерлерінің бірлесіп өткізген іс-қимылдарының нәтижесінде Қытай Халық Республикасынан Ресей Федерациясына бағыт алып, еліміздің территориясын басып өтпек болған ірі көлемдегі контрабанданың жолы кесілді. Тексеру барысында заңсыз жолмен жөнелтілмек болған 15 мыңнан аса жоғары сапалы аяқ киім және 700 мың дана іш киім тәркіленген. Тәркіленген тауарлар Семейдегі уақытша сақтау қоймасына жеткізілген.
{jcomments on}Құқық қорғау органдары қызметкерлерінің мәліметіне сүйенсек, Май-қапшағай кеден аумағынан асқаннан кейін, контрабандашылар күре жолдан бұрылып, ол жердегі қонақ үйден 150 метр қашықтықта 3 ауыр жүк көлікті тоқтатып, бақылау арқанын рұқсатсыз кесіп, тауарларды 4-ші көлікке тией бастаған көрінеді. Дәп осы уақытта құқық қорғау органдарының мамандары шұғыл әрекетке көшіп, заң бұзушыларды оқиға орнында құрықтаған. Қазіргі уақытта прокуратура өкілдері тәркіленген тауарларды қайта санау үстінде. Негізі құжат бойынша пропиленді қапшықтар, ұялы телефондарға арналған бұйымдар сияқты және басқа да заттар тасымалдануы тиіс болған. Яғни қолға түскендер арзан тауарлардың декларациясын көрсету арқылы оңай сытылып кетпек болған. Олар ірі көлемдегі контрабандалық тауарды Қазақстан арқылы Ресей қалаларына жеткізуді жоспарлаған. Қорапшалардың сыртында көршілес елдің қалаларының аттары нақты көрсетілген екен. Қазіргі уақытта бірқатар сараптамалар жасалып, алдын ала тергеу амалдары жүргізілуде. Аталмыш іске қатысы бар азаматтар қылмыстық жауапкершілікке тартылуы ықтимал екенін айтады ШҚО прокуратурасының басқарма басшысы Рустам Шидердинов.
— Олар Қытайдан транзиттік декларацияға сай емес өнімдерді заңсыз жолмен тасымалдамақ болған. Сондай-ақ құжатта тауарлардың жалпы құны 10 және 40 мың АҚШ доллары мөлшерімен көрсетілсе, іс жүзінде ондағы заттардың құны миллиондар шамасында болып шықты. Қазіргі сәтте келген шығынның нақты санын дөп басып айту қиынырақ. Сотқа дейінгі тергеу жұмыстары жүргізілгеннен кейін бәрі анықталатын болады. Аталмыш дерек бойынша ҚР Қылмыстық Кодексінің 254-бабына сәйкес, іс қозғалмақ,- дейді Р.Шидердинов.
Жақсылық МҰРАТҚАЛИ,
«Семей таңы»
