Кеше Семей қалалық мәслихатының кезектен тыс қырық үшінші сессиясы болып өтті. Сессияның күн тәртібінде бес мәселе қаралды.
{jcomments on}Алдымен Семей қаласының 2015 — 2017 жылдарға арналған бюджетіне Семей қаласы мәслихатының 2014 жылғы 23 желтоқсандағы шешіміне өзгерістер мен толықтырулар енгізу жөнінде қалалық экономика және бюджетті жоспарлау бөлімінің басшысы Гүлжан Алтынбекованың баяндамасы тыңдалды.
Гүлжан Қайырханқызының айтуынша, Шығыс Қазақстан облыстық мәслихатының шешіміне сәйкес, 2015 жылға арналған жалпы бюджет көлемін облыстық бюджеттен трансферттер мен кредиттер есебінен ұлғайтуды көздеп отыр. Соның ішінде трансферттер есебінен мұқтаж азаматтардың жекелеген топтарына әлеуметтік көмекке, қаланы абаттандыру мен көгалдандыруға, қала жолдарын орташа жөндеуге, сондай-ақ инженерлік коммуникациялық инфрақұрылымды жобалау, дамытуға қаражат қарастырылған. Оның ішінде тұрғын үйлерге инженерлік желілер құрылысына арнайы қаржы қарастырылып отыр. Ал қаланы абаттандыруды дамытуға қосымша 160 млн. теңгеге ұлғайтылды. Сонымен қатар Байсалықов көшесінде көп қабатты тұрғын үй құрылысын жобалау және салуға 47 млн. 065 мың теңгеге кредиттер есебінен ұлғайтылады.
Сондай-ақ экономика және бюджеттік жоспарлау бөлімінің басшысы Гүлжан Алтынбекова бюджеттің шығындарына функционалды топтың бөлінісінде облыстық бюджеттен трансферттер мен кредиттер есебінен ұлғайтуды және ішкі түзетулерді ескерумен бірқатар өзгерістер енгізілгені жайлы ақпараттардан құлағдар етіп, халық қалаулыларының сауалдарына жауап берді.
Сессияда қаралған келесі сұрақтың бірі «Жұмыспен қамтудың жол картасы — 2020» бағдарламасын жүзеге асыру мәселелері жөніндегі қалалық комиссияның дербес құрамы туралы болды. Аталмыш мәселе бойынша қалалық жұмыспен қамту және әлеуметтік бағдарламалар бөлімі басшысының міндетін атқарушы Жанат Никушев жауап берді. Өз кезегінде халық қалаулылары комиссияның құрамына қалалық мәслихат депутаттары мен кәсіподақ ұйымдарынан өкілдерін кіргізуді ұсынды.
Сонымен қатар сессияда аукционға шығарылатын жер телімін жалдау құқығын бекіту қарастырылды. Атап айтқанда, аукционға шығару үшін көп қабатты және көп пәтерлі тұрғын үйлер салу үшін Қарағайлы ауданынан бастапқы алаңы 1 гектар жер телімін бес жыл мерзімге жалдау құқығы бекітілді.
— Қарағайлы аумағында үш көп қабатты тұрғын үйлер салынатын болады. Бұл жерде айта кетуіміз керек, қазіргі күні барлық жер телімдері тек қана аукцион арқылы берілетін болды. Бұл өз кезегінде ашық және бәсекелестік жағдайда өткізуге үлкен мүмкіндік беріп отыр, — деді жер қатынастары бөлімінің басшысы Сүлеймен Медеуов.
Осы тұста сөз алған қала әкімінің орынбасары Асхат Хосчанов қаладағы магистральдық желілер бойынша атқарылып жатқан жалпы жұмыстарға тоқталып өтті.
— Бүгінгі күні қала бойынша барлық магистральдық желілер мемлекеттік сараптамадан өткізілді. Ал Қарағайлы ауданындағы магистральдық желінің құны 2,8 млрд. теңгені құрайды. Бұл жердегі құрылыстың алғашқы жұмыстарын жүргізу үшін облыстық бюджеттен қаражат бөлініп отыр. Алдағы уақытта мемлекеттік тапсырыс бойынша байқау өткізіліп, мердігер анықталатын болады, — дейді А.Хосчанов.
Жиында бұған қоса, сайлау комиссияларынан шығып кеткен мүшелерінің орнына мүшелер сайлау туралы және Семей қаласы мәслихатының регламентін бекіту туралы шешіміне өзгеріс енгізу жөнінде мәселелер қаралды. Сессияда көтерілген сұрақтарды қалалық мәслихат депутаттары бір ауыздан қолдап, дауыс берді.
Асан МЫРЗАХАНОВ,
«Семей таңы»
