Кеше, шілденің 16 күні Семей қаласына арнайы сапармен Қазақстан Республикасы Парламенті Мәжі-лісінің депутаттары Светлана Ферхо мен Александр Милютин арнайы келді. Мәртебелі меймандар бұл сапарлары барысында қаламыздағы бірқатар нысандарда болып, шаһар тіршілігіне қанықты. Елбасы Н. Назарбаевтың Жолдаулары аясында қолға алынған жұмыстармен танысып, қала халқымен жүздесті. Сонымен қатар еліміздегі Заңнама жүйесіндегі оң өзгерістер жайлы да бірқатар өзекті мәселелермен бөлісті.
{jcomments on}Астана төрінен келген халық қалаулылары ең алдымен шаһар іргесіндегі жаңадан бой көтеріп жатқан Қарағайлы ықшамауданында болып, ондағы Назарбаев зияткерлік мектебінің құрылысы барысымен танысты. Аталмыш нысанның құрылысын биылғы жылы аяқтау көзделген болатын. Оған пікір білдірген Александр Милютин мердігер компания өкілдеріне асығыстық жасамау қажеттігін, ең бірінші кезекте сапаға мән беруді ескертіп өтті. Қазіргі күні аталмыш нысанның құрылысы қала және облыс әкімдерінің назарында тұр.
Осыдан кейін ҚР Парламент Мәжілісінің депутаттары Рымбек Байсейітов атындағы қаржы-экономикалық колледжінде болып, шаһардағы білім және денсаулық саласының қызметкерлерімен жүздесті. Келелі басқосуға сонымен қатар әлеуметтік қорғау мен мәдениет саласының өкілдері де жиналды.
Көпшілік алдында ең алдымен Александр Александрович сөз алып, V шақырылымның IV сессиясында қозғалған негізгі тақырыптарға ықшам түрде шолу жасап өтті. Сонымен қатар жазғы демалысқа шыққан халық қалаулыларының ел аралап, түйіткілді мәселелерді тізіп алып, алдағы қыркүйектегі жаңа отырыс барысында өзге де халық қалаулылары алдында талқылауды мақсат еткендіктерін айта кетті. Сондай-ақ бұл сапарлары барысындағы алған әсерлері, Семейдің қазіргі даму қарқынына өндіріс және құрылыс саласының айтарлықтай ықпал етіп отырғанын да жеткізіп өтті.
Осыдан соң сөз кезегін алған Мәжіліс депутаты Светлана Ферхо Елбасының жуырда жарияланған «100 нақты қадам» атты Ұлт Жоспарының негізгі басымдықтарына, оның ішінде тікелей өзінің депутаттық құзырына кіретін мәселелер — білім мен әлеуметтік сала жайында кеңінен тоқталды. Әсіресе, Парламент Мәжілісіндегі Әлеуметтік-мәдени даму комитеті әзірлеген «Қазақстан Республикасының кейбір заңнамалық актілеріне зейнетақымен қамсыздандыру мәселелері бойынша өзгерістер мен толықтырулар енгізу туралы» Заң жобасы туралы кең көлемде баяндап өтті.
— Бұл заң жобасы Елбасының Жарлығына сәйкес, елімізде зейнетақы жүйесін одан әрі жаңғыртудың 2030 жылға дейінгі тұжырымдамасын іске асыру мақсатында әзірленген болатын. Ол зейнеткерлік жаста лайықты өмір сүру деңгейі үшін зейнетақы төлемдерінің тепе-теңдігін қамтамасыз етуге толыққанды мүмкіндік береді. Жаңа енгізілімдер зейнетақымен қамсыздандырудың теңдігін сақтап қалу үшін 2018 жылдан бастап зейнетақы жүйесінің жаңа құрамын енгізуді көздейді. Яғни БЖЗҚ АҚ-та ашылған шартты зейнетақы шоттарына жұмыс берушілер пайдасына олардың табыстарынан міндетті 5%-дық зейнетақы жарналарын аударатын қызметкерлер зейнетақы жүйесінің қатысушылары болып табылады, — деп атап өткен Светлана Ферхо зейнеткерлік жас мөлшері, зейнетақы мөлшері және жұртшылық Президенттік зейнетақы атап кеткен базалық зейнетақы туралы да кеңінен түсініктеме берді. Депутаттың айтуынша, өз жетекшілігімен құрылған арнайы жұмыс тобы бұл салаға қатысты барлық мәселелерді талқылап, жан-жақты салмақтап шыққан. Депутат, сондай-ақ жаңа жүйенің ел азаматтары үшін берер тиімділігінің аса жоғары екендігін айтады. Жиын барысында, сонымен қатар білім және денсаулық сақтау саласына қатысты да мәселелер қатар сөз болды.
Ал түстен кейін ҚР Парламенті Мәжілісінің депутаттары «Нұр Отан» партиясының қалалық филиалы ғимаратында азаматтарды жеке мәселелері бойынша қоғамдық қабылдау өткізді. Ол жайындағы материалды газетіміздің келесі нөмірінен оқи аласыздар.
Қуаныш ЖОЛЫМБЕТ,
«Семей таңы»
