Семей қаласының әкімі Ермак Бидахметұлы Сәлімов «Семей» көгалдандыру және көркейту мекемесінінің ұжымымен жүздесті. Шаһар басшысымен кездесу кезінде мекеме жұмысшылары бірқатар мәселелерін ортаға салды.
{jcomments on}«Семей» көгалдандыру және көркейту мекемесі 2007 жылы құрылған. Мекеменің негізгі міндетіне қала тазалығын қадағалау, көгалдандыру жатады. Бұл күнде мекемеде 251 адам еңбек етеді және құзырында 65 бірлік техника бар. Биыл шаһар тазалығына жергілікті бюджеттен 363 млн. теңге бөлініпті.
Қала әкімімен кездесу барысында мекемедегі бірқатар мәселелер де айтылды. Әсіресе, жұмысшылар еңбекақыларын уақтылы ала алмайтындарына қынжылыс білдірді. Мәселенің мән – жайына қаныққан қала басшысы тазалық мекемесінің басшылығына тек мемлекеттің бөліп отырған қаражатына қарап отырмай, қосымша табыс көзін қарастыруды тапсырды.
— Өздеріңіз білетіндей, тұрақты түрде жұмыс істеп тұрған бірнеше өндіріс ошақтарында болдым. Енді проблемалы нысандарды аралауды бастадым. Міне, қала тазалығына жауапты бірден – бір мекеменің ұжымымен кездестім. Кешіктірілген жалақы мәселесі шешіледі. Осы ретте айтарым, мен мекеме басшылығының мемлекет тарапынан бөлінетін қаражатпен шектеліп отырғанына мүлдем қарсымын. Семейде шағын және орта бизнес субъектілері көп. Тазалық мекемесінің арнайы мамандары шағын және орта кәсіп саласының өкілдерімен байланыс орнатып, қосымша жұмыс көлемін қарастырулары қажет. Тек қана бюджеттен бөлінетін қаражатқа қарап отырмай, табыс табудың жолдарын іздестіргендері абзал, — деп атап өтті Ермак Бидахметұлы.
Кездесуде мекеме қызметкерлері қала тұрғындарының тазалық мәдениетін сақтамай, немқұрайлы қарайтынын да атап өтті. Осы ретте кәсіпорын жұмысшылары қала әкімінен нақты шаралар қабылдауға өтініш білдірді. Өз кезегінде Ермак Бидахметұлы аталған мәселе басты назарда екенін, тазалыққа немқұрайлы қарайтындар қатаң жауапкершілікке тартылатынын жеткізді.
— Қала тазалығы тек сіздердің міндеттеріңіз деген қате ұғым қалыптасқан. Семей қаласының әр тұрғыны қаланы гүлдендіріп, көркейтуге атсалысуы тиіс. Әр тұрғын өз ауласын, әр ПИК өз қарамағындағы аумақты ұқыпты ұстай білуі керек. Қазіргі уақытта Семей қалалық ішкі істер басқармасы қосымша 20 бақылау камерасына ие болмақ. Оларды адамдар жиі серуен құратын, қоғамдық орындарға орналастыруды жоспарлап отырмыз. Осы ретте БАҚ арқылы қала тұрғындарынан сұрайтыным, тазалық- белгілі бір мекеме, кәсіпорын және әкімдіктің ғана атқаратын жұмысы емес. Өз қаламыздың тазалығы үшін ортақ көзқараста болуымыз керек, — деп атап өтті қала әкімі.
Әлбетте, қала тазалығы — баршаға ортақ іс. Тұрғындардың ішкі мәдениеті де қала келбетіне тікелей әсер ететіні шындық. Шаһардың әр тұрғыны өз қаласына сүйіспеншілікпен қарай білсе, ертелі – кеш көше бойын жағалап жүрген жұмысшылардың да еңбегі еш кетпейді.
Жақылық МҰРАТҚАЛИ,
«Семей таңы»
