Семей автокөлік құрастыру зауыты – шығыс өңірі ғана емес, республикадағы ірі көлік концерндерінің көш басында келе жатқан кәсіпорын. «ҚазАгро» холдингі желісі бойынша қолдау көрсетіліп 1,3 млрд. теңгеге инвес-тицияланған «СемАЗ» машина жасау зауыты жуырда «Беларусь» тракторының 7 000-шы санын шығарды. Осыған орай «ҚазАгро» холдингі республикалық және жергілікті БАҚ өкілдеріне пресс-тур өткізді.
{jcomments on}«СемАЗ» ЖШС бас директоры Әсемхан Досқожановтың айтуынша, кәсіп-орында 300-ден астам адам жұмыспен қамтылған. «СемАЗ» ЖШС тракторлар өндірісінің тарихы 2009 жылы Қазақстанда ауылшаруашылық техникаларын құрастыру өндірісін ұйымдастыру жөніндегі конкурстан басталған. «ҚазАгро» холдингінің еншілес компаниясы – «ҚазАгроҚаржы» АҚ өткізген байқауға Семейдің машина жасаушыларынан түскен өтінімге кейіннен 3000 бірлікке дейінгі техниканың өндірісімен жылына 1000 тракторды құрастыру өндірісі енгізілген. Осылайша, өндіріс “Беларусь 80.1”, “Беларусь 82.1” және “Беларусь 1221.1” маркалы тракторлардың үш моделін құрастыруды бастады.
Аталмыш техникалар кездейсоқ таңдалып алынған жоқ. Өйткені сенімділігі, күй талғамайтындығы және функционалдық мүмкіндіктерінің ауқымдылығы жағынан бұл тракторлар бұрыннан ауыл шаруашылығында ғана емес, сондай-ақ коммуналдық шаруашылықтарда да кеңінен қолданылып келеді. Әртүрлі аграрлық шараларды жүргізуден өзге, көшелерді, жолдарды және жаяу жүргінші жолдарын тазарту үшін де аса ыңғайлы.
Бүгінгі таңда кәсіпорын тоғыз трактор моделін шығаруды меңгерді. Оның ішіндегі ең жетілдірілгені “Беларусь 3522” болып табылады. Зауыттың техникалық сипаттамасына сәйкес, ол ауыл шаруашылығында аса көп энергияны қажет ететін жұмыстарды орындауға арналған, соның ішінде дәнді және басқа дақылдарды егу, жемшөп азықтарын дайындау, сондай-ақ жүк тасымалдарымен байланысты жұмыстарды орындауға бейімделген. Зауытта, атап өтілгендей, барлық «Беларусь» техникасы тұтынушының тілегі бойынша қазақстандық кәсіпорындармен шығарылған аспалы жабдықтардың кеңейтілген түрімен жабдықталады.
«ҚазАгро» холдингі өндірісті қаржыландырумен ғана шектелмейтінін атап өту қажет. Ұлттық холдинг бүгінде зауытқа шығарылған техникаларын өткізу кезінде де тиімді көмегін көрсетіп келеді. Атап айтсақ, «ҚазАгроҚаржы» АҚ-ның лизинг бағдарламаларының арқасында кәсіпорын республиканың шаруашылықтары мен агроқұрылымдарына барлық құрастырылған тракторлардың жартысынан көбін жөнелтеді. «СемАЗ» ЖШС директоры Әсемхан Досқожановтың айтуы бойынша, тек «ҚазАгро» холдингінің инвестициялық бағдарламасының арқасында зауыт өндірісті жүргізіп және өнімдерін тоқтаусыз өткізуді жолға қойды және дағдарыс кезеңінде де құрастыру үрдісін тоқтатқан емес.
Тракторлардан басқа, “СемАЗ” ЖШС автобустар мен жүк автокөліктерін шығару өндірісін жолға қойған. Құрастыру, дәнекерлеу және бояу жұмыстарынан тұратын толық цикл принципі бойынша зауыттың технологиялық желілерінде «Daewoo» автобустары шығарылады, ал 2013 жылдан бастап Семейдің машина құрастырушылары 25 тоннаға дейінгі жүкті көтере алатын «Урал» және «SHACMAN» автокөліктерін шығара бастады.
А. САМАТҰЛЫ,
«Семей таңы»
