Семей қаласындағы «Артон-kz» ЖШС -де «Валеас» сауда белгісімен жартылай фабрикаттар мен шұжықтың жүзден астам түрі өндіріледі. Нарықта жұмыс жасап келе жатқандарына биыл он бес жыл болған ет өңдеу зауыты тек мемлекеттік стандарт талабы бойынша қызмет етуде. Демек, ет өңдеу кәсіпорнында байырғы дәстүрлер сақталған және сапасына үлкен мән берілген. Кәсіпорын Шығыс Қазақстан облысы бойынша жартылай қақталған өнім түрлерін шығаратын жал-ғыз ет өңдеу мекемесі саналады. Себебі аталмыш өнім түрін шығару, біріншіден, қиын болса, екіншіден, арнайы қондырғы тек осы мекемеде ғана екен.
{jcomments on}«Артон-kz» ЖШС жартылай фабрикаттар мен шұжық өнімдерін неміс технологиясымен және қондырғысымен өндіріп келеді. Ал өндіріске қажетті шикізатты жергілікті шаруа қожалықтарынан алады екен. «Артон-kz» ЖШС өндіріс бойынша, директоры Альфия Жакенованың айтуынша, бұл бір жағынан жергілікті кәсіпкерлерге қолдау болса, екіншіден өнімнің сапасын көрсетеді.
— Өнімдеріміз қымбатырақ болуы мүмкін. Өйткені кәсіпорын өнім түрлерін ешқандай химялық қоспасыз, тек нағыз еттен жасап шығарады. Бүгінгі күні «Валеас» сауда белгісімен бұқтырылған шұжықтар, бұқтырылып қақталған шұжықтар, жартылай қақталған шұжықтар және жартылай фабрикаттар сынды жүзден астам өнім түрлері шығарылады, — дейді Альфия Газимовна.
Заманауи шетелдік жабдықпен жабдықталған цехтарда күніне 1,5 тоннаға дейін ет өңделеді. Ал өнімдер, негізінен, Семей мен Өскемен қалаларына, сондай-ақ Риддер мен Курчатов және Глубокое, Шемонайха, Абай, Бесқарағай, Бородулиха аудандарына жіберіледі. Бір сөзбен айтқанда, өнім түрлері Шығыс Қазақстан облысына түгел тарап отыр. Бұған қоса кәсіпорын Павлодар облысына да өз өнімдерін жіберуді қолға алыпты. Бүгінде мекеме алпысқа жуық адамды жұмыспен қамтуда. Ал жұмысшылардың орташа жалақылары 60 — 70 мың теңгені құрайды екен.
— Өнімдер барлық қалалардағы дүкендерге таратылады. Одан өзге кәсіпорын мемлекеттік сатып алуларға қатысады. Бүгінгі күні облыс бойынша 15 мекемеге, атап айтсақ балабақшалар, мүгедектер мен қарттар үйлерімен әріптестік орнаған. Ардагерлер мен аз қамтылған отбасыларға көмек көрсетіп, қайырымдылық шараларына да қатысып отырамыз. Әрине, алдағы уақытта кәсіпорынды қайта жаңғыртып, өнім түрлерін арттыру да жоспарымызда бар, — деген «Артон-kz» ЖШС өндіріс бойынша директоры Альфия Жакенова, — жуықта Ресейде орын алған жағдайдан біздің кәсіпорынды да үлкен шығынға батты. Барлығы арзан өнімдер ала бастады. Әрине, бізге мұндай жағдай аз ғана уақыт ішінде орын алатыны белгілі еді. Өйткені тұтынушылардың бір-екі рет сапасыз өнім алғаннан кейін-ақ түсінетінін білдік. Солай болды да. Көп ұзамай тұтынушылар отандық сапалы өнім түрлерін қайта ала бастады. Расында, нақты ойланып қарайтын болсақ, егер базарда ет мың теңге тұрса, шұжықтың бір данасы 300-500 теңге болуы мүмкін бе?! Осы жерде тұтынушы ойлануы керек. Мұндай өнімде ет жоқ деген сөз. Міне, сондықтан да біздің кәсіпорын, ең бастысы, сапаған үлкен мән береді. Қазір осыны түсінген тұтынушыларымыз кәсіпорынмен жылдар бойы жұмыс жасап келеді.
Асан МЫРЗАХАНОВ, «Семей таңы»
