Мемлекет басшысы Н. Назарбаевтың «Нұрлы жол» бағдарламасы аясында Семей қаласындағы жылу қазандықтары жөндеуден өтетін болады. Жылу қазандықтарының жөндеу жұмыстарына Үкіметтен 1 млрд. 724 млн. теңге қаражат қарастырылыпты. Бұл туралы Семей ақпараттық орталығында Семей қаласы тұрғын үй — коммуналдық шаруашылығы және автомобиль жолдары бөлімінің басшысы Александар Генрихтың қатысуымен өткен баспасөз мәслихатында мәлім болды.
Қазір алдағы қысқы маусымға дайындық қызу жүріп жатыр. «Нұрлы жол» бағдарламасы негізінде бөлінген қаражатты мақсатты жұмыстарға жаратуға байқау жарияланған. Байқауға он компания қатысуға ниет білдірген. Жеңімпаздар анықталғаннан кейін, шаһардағы бірнеше қазандық пен жылу жүйелеріне жөндеу жұмыстары басталатын болады. Жөндеу жұмыстарына облыстық бюджеттен қосымша 186 млн. теңге бөлінеді деп күтілуде. Сонымен қатар РК – 1 қазандығының іске қосу жүйесін ретке келтіру мәселесіне облыс қазынасынан жобалық – сметалық құжатқа қосымша 20 млн. теңге бөлініпті. Қазір РК -1 қазандығында биылғы жылға жоспарланған құрылыс – монтаж жұмыстары аяқталуға жақын.
{jcomments on}- Ағымдағы жөндеу жұмыстарын мерзімінде аяқтауды жоспарлап отырмыз. РК – 1қазандығына Германияда шығарыл-ған заманауи генератор орнатылатын болады. Бұл өз кезегінде электр қуатын үнемдеуге септігін тигізе отырып, қала тұрғындарын қуат көзімен қамтамасыз етуге мүмкіндік береді. Ал коммуналдық тариф жөнінде облыс әкімінің орынбасары Димитрий Гариков арнайы баспасөз мәслихаты барысында толыққанды ақпаратпен қамтамасыз ететін болады, — деп атап өтті бөлім басшысы Александар Генрих.
Биылғы қысқы маусымға тұрғын үйлердің техникалық төлқұжаттарының дайындығы 12 — 13%-ды құрап отыр. Жылу маусымына санаулы айлар қалғандықтан, тұрғын үй инспекциясы мамандары бұл мәселені назарына ұстауда. Сонымен қатар заңды және жеке тұлғалар коммуналдық қарыздарын да төлеуге асығар емес. Александар Генрихтың айтуынша, қалалықтардың жылу мекемесі алдындағы жалпы қарызы 600 млн. теңгені құрап отыр.
Баспасөз мәслихатында коммуналдық мекемелердің өздерінің де жарық үшін қомақты берешегі бар екені айтылды. Мәселен, «Теплокоммунэнерго» МКК 800 млн. теңге, «Семей-Водоканал» МКК 270 млн. теңгеге жуық қарыздары бар. Қордаланған қарыздарды жабу мақсатында облыс әкімдігімен бірлесе кешенді жоспар қабылданған екен. Жоспар негізінде «Семей-Водоканал» мекемесінің 25 млн. теңге қарызы өтеліпті. Ағымдағы жылы қаладағы қазандықтарды көмірмен қамтамасыз ету мәселесі де өз шешімін тапқан. Оған республикалық бюджеттен 1 млрд. теңгеге жуық қаражат бөлінеді деп жоспарланып отыр.
Жолдарды орташа жөндеу жұмыстарына облыстық бюджеттен 219 млн. теңге бөлінген. Аталған қаражат Семейдегі 17 көшені орташа жөндеуге жұмсалуда. Жолдарды жөндеу қыркүйек айының басында аяқталады деп күтілуде.
Айтпақшы, № 6 мектеп — гимназия маңындағы жаяу жүргіншілерге арналған жерүсті жолының құрылысы келер жылы аяқталады екен. Сонымен қатар семейліктердің жиі серуендеп, тынығатын Ертіс өзенінің жағалау аймағын көркейту жұ-мыстары да аяқталуға жақын. Келешекте жағалауда орналасқан субұрқақ қайта жөндеуден өткізілмек.
Жақсылық МҰРАТҚАЛИ,
«Семей таңы»
