Семей ақпарат орталығында ШҚО әкімінің орынбасары Димитрий Гариковтің және қала әкімі Ермак Сәлімовтің қатысуымен баспасөз мәслихаты өтті. Жиын тақырыбы алдағы жылу маусымына даярлық, коммуналдық қызмет тарифі турасында өрбіді.
Басқосу барысында аймақ басшысының орынбасары ТМД елдері бойынша су және электр энергиясы тарифтері жайлы сөз қозғап, бірқатар мысалдар келтіріп өтті. Мониторинг нәтижесі көрсеткендей, біздің елімізде коммуналдық қызмет үшін ең төмен баға қойылған. Оның ішінде Шығыс Қазақстан облысының тұрғындары ең аз төлемдер төлейді. Әйтсе де жыл өткен сайын, көрсетілетін қызметтің қымбатқа түсіп бара жатқаны байқалуда. Бір ғана мысал, ел Үкіметі аталмыш саланы қайта жаңғырту ісіне қомақты қаражат жұмсауда. Атап айтсақ, 2011-2014 жылдар аралығында ШҚО бойынша 9 нысан күрделі жөндеуден өтіп, ел игілігіне беріліпті. Өскемен мен Семейдегі су құбырлары, кәріз жүйелері жаңартылған. Яғни, қорыта айтқанда, аталмыш сала қызметін сапалы етуде жұмсалатын шығын өте көп болып тұр. Ал 2015 жылы бұл тарапта 15 нысан жаңғыртылмақ. Аталмыш бағыт бойынша арнайы жобалар әзірленген.
{jcomments on}- Жалпы, Елбасы Н.Назарбаевтың «Нұрлы жол» бағдарламасы аясында тың шаралар қолға алынатын болады. Осы кезеңге дейін жүзеге асырылып жатқан ТҮКШ саласын жаңғырту ісіне тың серпін берілмек. Жоспарлы бағдарламалар аясында тариф саясатын да оңтайлы жүргізу қолға алынуда. Төлемақы бағасының құбылмалылығы әлеуметтік жағынан аз қамтылған отбасыларға салмақ түсірмеуі тиіс. Бұл мәселе де тыңғылықты ойластырылуда, — деп атап өтті өз сөзінде Димитрий Гариков.
Облыс әкімінің орынбасары сонымен қатар Семейдегі жүргізіліп жатқан алдағы жылу маусымына даярлық шараларына да тоқталып өтті. Қазіргі күні бұл үдеріс кедергісіз жүзеге асырылуда. Сондай-ақ ТҮКШ саласында атқарылуы тиіс бірқатар шаралар бар. Атап айтсақ, тек Семей қаласында ғана емес, ШҚО көлемі бойынша су жүйелерінің ескіргені, құбырлардың жиі сыр беретіні осы бағытта жүйелі жұмыс жүргізу қажеттілігін тудыруда. Оның ішінде станциялардағы су соратын насостарды жаңартудан бастап осы салада еңбек ететін қызметкерлердің төмен саналатын жалақысын жоғарылатуға дейінгі аралықта ауқымды іс көзделуде. Бұл тарапта, әрине, алғашқы кезектегі мәселе қаражатқа да келіп тірелетіні белгілі. Сол себептен де дәл қазіргі күні тұтынылатын су үшін қойылған тарифтің өзгертілуі уақыт талабынан туындаған маңызды жайт болып тұр.
Баспасөз мәслихаты барысында облыс әкімінің орынбасарына журналистер тарапынан сауалдар да қойылды. Мәселен, «Теплокоммунэнерго» МКК алдында қомақты көлемде қарыз болып саналатын әрі оны төлеуден жалтарып жүрген тұрғындарға қандай да бір шара қолданыла ма деген сауалға Д. Гариков тұтынушылар қарызының қомақты болуы себепті алдағы уақытта түрлі шаралар қолға алынуы мүмкін екенін жеткізді. Бұл ретте өзінің Семей қаласы әкімінің орынбасары болып тұрған шағында құзырлы органдармен бірлесіп арнайы рейдтік шаралар жүргізіп, борышкерлерден берешек төлемақыны өндіру біршама нәтиже бергенін де айтып өтті.
Осыдан соң облыс әкімінің орынбасары қалалық әкімдікте қоғамдық ұйымдар мүшелерімен кездесу өткізді. Басқосуға қаламыздағы саяси партиялар жетекшілері, қоғамдық бірлестік өкілдері жиналды. Бұл жиында да елімізде, оның ішінде Шығыс өңірде қолға алынған тариф саясаты және одан түсер оң нәтиже туралы кең көлемді ақпарат беріп өтті. Жиынға қатысушылар да өз ой-пікірін білдіріп, ұсыныстарын жеткізді.
Қуаныш ЖОЛЫМБЕТ,
«Семей таңы»
