Мемлекет басшысы Н. Ә. Назарбаевтың 5 институционалдық реформасын жүзеге асыруға бағытталған 100 нақты қадамның бірінші бөлімінде кәсіби мемлекеттік аппарат құру жүктелген. Кәсіби аппарат құру арқылы мемлекеттік қызметті жетілдіре отырып, ықшам әрі тиімді жұмыс жүргізу қағидасы көзделген. Бұл ретте сала мамандарының жалақысы қызмет сапасы мен оң нәтижесіне қарай жоғары болуы керектігі ескеріледі. Жаңа заңнамаларды әзірлеу барысында жемқорлыққа қарсы күресті күшейту қажеттілігі де қарастырылған.
{jcomments on}Осы ретте Семей қаласы әкімдігінде ШҚО әкімі аппаратының ШҚО аймақтық мемлекеттік қызметшілерді қайта даярлау және біліктілігін арттыру орталығының директоры Жұлдызбек Тоштыбаевтың қатысуымен жиын өтіп, онда Ұлт Жоспарында көрсетілген кәсіби мемлекеттік аппарат құру, мемлекеттік қызметшілердің сапалық деңгейін арттыру жөнінде кеңінен айтылды.
Жаңа Ұлт Жоспарында кәсіби мемлекеттік аппарат құру мәселесіне баса мән берілген. Мемлекеттік қызметке байланысты реформалардың шешуші бағыттары туралы баяндаған Жұлдызбек Тоштыбаев мемлекеттік аппаратты қалыптастыруды, оны кәсібилендіруді қарастырып, мемлекеттік қызметкерлерге қойылатын талаптардың күшейтілетіндігін атап өтті. Мемлекеттік аппаратты кәсібилендіру 15 қадамнан тұрады.
— Қазақстанда тәуелсіздік алған жылдардан бері, мемлекеттік қызмет заңына өзгерістер енгізіліп келеді. Соңғы өзгеріс 2013 жылы орын алды. Бұл — тоқтамайтын үрдіс. Қазір оның үстіне жаһандық экономикалық дағдарыс кезінде әлемнің біраз елдерінде тұрақсыздық орын алуда. Осының барлығына уақытында жауап беретіндей, болашақта сенім үрдісінен шығатындай мемлекеттік аппарат болуы керек. Бұл ретте Мемлекет басшысы ұсынған «100 нақты қадамдағы» кәсіби мемлекеттік аппарат құрудың және оны іске асырудың маңызы зор,- дейді мемлекеттік қызметшілерді қайта даярлау және біліктілігін арттыру орталығының директоры Жұлдызбек Тоштыбаев.
Оның айтуынша, бұл бағытта алдағы жылдан бастап жаңа жалақы төлеу жүйесін енгізу көзделуде. Ендігі уақытта мемлекеттік қызметкерлердің жалақылары жұмыстар нәтижесіне қарай негізделетін болады. Бұдан бөлек мемлекеттік қызметшілерді жүйелі түрде оқытып, біліктілігін арттыру заң жүзінде бекітіледі. Сондай-ақ мемлекеттік қызметке үміткерлерді іріктеу орталықтандырылып, Мемлекеттік қызмет істері агенттігінің рөлін күшейту жоспарлануда.
Жұлдызбек Тоштыбаевтің айтуына қарағанда, алдағы уақытта мемлекеттік қызметшілердің барлық деңгейін, соның ішінде құқық қорғау органдарын да қамтитын «Мемлекеттік қызмет туралы» жаңа Заң қабылдау жоспарланған.
Ұлт болашағының жоспарына баланған 100 нақты қадамда көрсетілген негізгі міндеттерді құқық қорғау қызметкерлері арасында түсіндіру бойынша Семей қалалық ІІБ да ШҚО бойынша Мемлекеттік кірістер департаментінің бөлім жетекшісі Гүлмира Сабырбалинова аталмыш стратегиялық құжаттың шешуші жақтары мен бағыттары туралы толыққанды ақпарат беріп өтті.
— «100 нақты қадам» — бұл жаһандық және ішкі сын-қатерлерге жауап және сонымен бірге жаңа тарихи жағдайларда дамыған мемлекеттердің отыздығына жақын арада кіру жөніндегі ұлттық жоспар және тікелей қолданылатын нұсқау, — деді Гүлмира Сабырбалинова.
Іс-шараны қорытындылау кезінде Елбасының «100 нақты қадам» атты бағдарламалық құжаты еліміздің әрбір азаматына және Қазақстанның болашағына қатысты екендігіне, сонымен қатар егжей-тегжейлі зерделеу қажеттігіне баса назар аударылды.
Асан МЫРЗАХАНОВ,
«Семей таңы»
