Тамыз айының екінші жексенбісі – құрылысшылардың кәсіби мерекесі. Жұртшылық арасында өзіндік орны бар мереке еліміз бойынша жыл сайын дәстүрлі түрде атап өтіледі. Биыл да аталмыш мереке ескерусіз қалмады. 7 тамыз күні Семей қаласындағы бірқатар сәулетті ғимараттарға қолтаңбаларын қалдырып, шаһардың көркеюіне үлес қосқан ардагер құрылысшылар бас қосты. Қала әкімі Ермак Сәлімов ардагер құрылысшыларға құрмет көрсетіп, оларды кәсіби мерекелерімен құттықтады.
{jcomments on}Соңғы жылдары Семейде құрылыс саласы ерекше қарқын алып келеді. Шаһардағы бой көтеріп жатқан әлеуметтік маңызы бар нысандар мен салынып жатқан көп қабатты тұрғын үйлер қала болашағының баянды екенін көрсетіп тұрғандай.
Айта кету керек, 1971 жылдан бері жаңартылмаған Семей қаласының Бас жоспары, араға 40 жыл салып, 2011 жылы бекіген болатын. Қаланың алдағы 25 жылға арналған көркемдік әрі келбетті сәулеті айқындалған Бас жоспар негізінде енді ретсіз құрылыс жүргізілмек емес. Қазіргі уақытта қалада қандай да бір құрылыс жұмыстарын бастау үшін, Бас жоспарға сәйкес, арнайы рұқсат алу керек. Бұл да шаһардағы ретсіз құрылыстардың жүргізілуіне тосқауыл болатыны даусыз.
Жыл өткен сайын көркейіп, ажарланып келе жатқан Семейде бүгінде сәулетті ғимараттар мен көп қабатты тұрғын үйлер көптеп салынуда. Мысалы, тұрғын үй құрылысын дамытудың мемлекеттік бағдарламасы аясында Семейдегі Энергетик кентінде Синицын көшесінде, Ж.Аймауытов көшесінде пайдалануға берілген жаңа үйлер баспананың тауқыметін тартып жүрген отбасыларды қуанышқа бөлесе, қаланың орталық бөлігінен орын тепкен «Халық банкі» АҚ-ның Семей филиалының жаңа ғимараты шаһарға ерекше көрік беріп тұр.
Ал өткен жылы пайдалануға берілген Докучаев көшесіндегі жатақханаға «Жұмыспен қамтудың жол картасы – 2020» бағдарламасы негізінде балалар үйінің түлектері мен жас отбасылар қоныстанған болатын. Сол сияқты Өңірлерді дамыту бағдарламасы аясында Шугаев көшесі, 159 мекенжайында да көп қабатты тұрғын үй жақында пайдалануға беріліп, қалалықтардың қуанышын еселей түскен еді. Бұл орайда іскер азаматтардың жекеменшік-әріптестік негізінде салып жатқан тұрғын үйлері – өз алдына бір төбе. Сондай-ақ облыс әкімі Даниал Ахметовтің нұсқауымен жаңадан ашылған Қарағайлы ықшам ауданында да бүгінгі таңда құрылыс көрігі қызып тұрғанын айта кеткен жөн. Тұрғын үйлердің, Назарбаев Зияткерлік мектебінің заманауи үлгідегі жаңа ғимаратының құрылысы да осы Қарағайлыда. Семей мемлекеттік медицина университетінің жатақханалары да осы жерде бой көтереді.
Дастарқан басында бас қосып, тағылымды әңгіме өрбіткен ардагер құрылысшылар өздерінің өмірлік тәжірибелерімен бөлісіп, қаланы көркейту жайындағы ойларын ортаға салды. Бүгінгі күнгі аталмыш сала бойынша атқарылып жатқан жұмыстарға да көңілдері толатындықтарын жеткізді.
Қала әкімі Ермак Сәлімов ардагер құрылысшыларды кәсіби мерекелерімен құттықтап, ел игілігі жолында еңбегі сіңген, қаланың көркеюіне зор үлес қосып, бүгінде жастарға келелі кеңес беріп жүрген қазыналы қарттардың дендеріне саулық, отбасыларына амандық тіледі.
Өз кезегінде ардагерлер атынан сөз алған Құрылыс саласының ардагерлері кеңесінің төрағасы, ҚР-ның еңбек сіңірген құрылысшысы Тлеубек Матаев әріптестерін, замандастарын, барлық құрылыс саласының мамандарын кәсіби мерекелерімен құттықтай келе, қала әкімі Ермак Бидахметұлына және кездесуді ұйымдастырған Семей қаласы құрылыс бөлімінің ұжымына алғысын білдірді.
Өз тілшіміз.
