Сенбі, 15 тамыз күні Семей қалалық Мәдениет сарайында «Тіл мәртебесі – ел мәртебесі» тақырыбымен ҚР Мемлекеттік қызмет істері және сыбайлас жемқорлыққа қарсы іс-қимыл агенттігінің аумақтық бөлімшелері арасында сайыс ұйымдастырылды. Мемлекеттік тілдің маңызын арттыруға бағытталған байқауға Семей қаласының әкімі Ермак Сәлімов, ҚР Мемлекеттік қызмет істері және сыбайлас жемқорлыққа қарсы іс-қимыл агенттігінің ШҚО бойынша Департаменті басшысының орынбасары, тәртіптік кеңес төрағасы Тоқтамыс Жұмағұлов арнайы қатысты.
{jcomments on}
Сайыстың басты мақсаты ҚР Үкіметімен бекітілген тілдерді дамыту мен қолданудың 2011-2020 жылдарға арналған мемлекеттік бағдарламасын жүзеге асыру, мемлекеттік тіл саясатын насихаттау, мемлекеттік тілді жетік білетін қызметкерлер деңгейін тексеру, олардың тілді оқып-үйренуге қызығушылығын арттыру болып табылады. Байқауға ҚР Мемлекеттік қызмет істері және сыбайлас жемқорлыққа қарсы іс-қимыл агенттігінің Қарағанды, Павлодар және Шығыс Қазақстан облысы аумақтық Департаменттері қатысуға ниет білдіріпті. Байқау 5 кезеңнен тұрды. Нақтырақ айтқанда, әр өңірдің командалары таныстыру, департамент жұмысы туралы бейнеролик, қазақтың салт-дәстүрлерін көрсету, патриоттық әндер жарысы немесе өлең оқу мен дебат өткізу кезеңдерінде өзара мықтыны анықтады. Көпшілік алдында сөз алған шаһар басшысы Ермак Бидахмет-ұлы осындай мәдени байқаудың қаламызда ұйымдастырылғанына алғысын білдіріп, ұлылар мекеніне келген сайыскерлерге сәттілік тіледі.
— Құрметті тіл жанашырлары, қадірлі қонақтар! Өнер байқауларына толы Семей жерінде тағы бір мәдени істің куәсі болып отырмыз. Кеше ғана ұлы Абайдың 170 жылдығын кең көлемде атап өткен едік. Бүгін, міне, үш облыс арасында «Тіл мәртебесі – ел мәртебесі» атты сайыс ұйымдастырылды. Осы орайда Қарағанды, Павлодар және Шығыс Қазақстаннан келген қонақтарға Ұлылар мекеніне қош келдіңіздер дейміз. Құрметті сайыскерлер осы ұйымдастырылып отырған тіл сайысында нағыз мықты топ дара шығады деп есептеймін. Семей жеріндегі қадамдарыңызға тек сәттілік тілеймін,- деген ізгі ниетін жолдады қала әкімі.
Өз кезегінде ҚР Мемлекеттік қызмет істері және сыбайлас жемқорлыққа қарсы іс-қимыл агенттігінің ШҚО бойынша Департаменті басшысының орынбасары, тәртіптік кеңес төрағасы Т. Жұмағұлов қалалық әкімдіктің аталмыш шараны өткізуде қолдау білдіргені үшін алғысын жеткізді.
— Құрметті мемлекеттік қызметкерлер! Тілдерді дамыту мен қолданудың 2011-2020 жылдарға арналған мемлекеттік бағдарламасын жүзеге асыруда атқарып жатқан еңбектеріңізге табыс тілеймін. Семейді мәдениеттің ордасы деп айтуға толық негіз бар. Мұндай үлкен сайыстың өтуіне ұйытқы болған Семей қаласының әкімдігіне алғысымды білдіремін. Ал қатысушыларға сәттілік жолдас болсын,- деді өз сөзінде Тоқтамыс Қадошұлы.
Өнер додасының қорытындысына келер болсақ, командалық есепте Павлодар құрамасы топ жарды. Өкінішке орай, жеңіс тұғырына шығысқазақстандықтар сәл жетпей, екінші орынды қанағат тұтты. Үшінші орында тиісінше Қарағанды командасы тұрақтады. Енді үздік шыққан топ қыркүйек айында Елордада өтетін ақтық сында өнер көрсетеді деп күтілуде.
Жақсылық МҰРАТҚАЛИ, «Семей таңы»
