Жуырда Үндістанда кикбоксингтен Азия чемпионаты өз мәресіне жеткен болатын. Сары құрлықтың кіл мықты спортшылары жиналған байрақты бәсекеде қазақ оғландары жалпыкомандалық есепте топ жарған еді. Аталмыш сында ұлттық құраманың сапында өнер көрсетіп, барлық қарсыластарын айқын басымдылықпен ұтып, үздіктер қатарынан көрінген семейлік 3 саңлақты сәрсенбі күні қала әкімі Ермак Сәлімов жұмыс кабинетінде қабылдады.
{jcomments on}Тамыздың 1-9 күндері Үнді елінің Пуна қаласында өткен ел намысы сарапқа салынған тартысты додада жерлес спортшылар ең жоғары нәтижеге қол жеткізген екен. Атап айтқанда, кикбоксингтің лоу-кик түрінен 57 келіде әлемнің 4 дүркін чемпионы Бауыржан Құдайбергенов осы жолы да өзгелерге өзінің теңдессіз спортшы екендігін дәлелдей білген. Ал К-1 санатының 67 келісінде Қанағат Нұрғалиевқа тең келер қарсылас табылмапты. Сонымен қатар фулл-контакт дәрежесінде сынға түскен тағы бір жерлесіміз Саят Трусбековтің де айы оңынан туып, алтыннан алқа таққан. Кездесу барысында кикбоксингтен Қазақстан құрама командасының бас бапкері Қайрат Смағұлов шаһар басшысына жылы шыраймен қабылдағанына ризашылығын білдіріп, алда атқарылатын жоспарларымен бөлісті.
— Құрметті Ермак Бидахметұлы! Бізді осылай қарсы алғаныңызға зор алғысымызды білдіреміз. Үндістандағы жарысқа келер болсақ, 20-ға жуық мемлекеттен 300-ге тарта спортшы өзара бақ сынасты. Біздің командамыз намысты қолдан бермей, 24 алтын, 3 күміс және 5 қола медальмен елге олжалы оралды. Оның ішінде Семей кикбоксинг мектебінің 3 шәкірті жоғары нәтижеге қол жеткізіп отыр. Араларында Әлем біріншілігінде 4 рет атойлатқан Бауыржан Құдайбергенов сынды тәжірибелі спортшы бар. Бауыржанның осы жекпе-жек түрімен айналысып келе жатқанына 15 жыл уақыт болыпты. Дей тұрғанмен біз осы межемен тоқтап қалмақ емеспіз. Алдағы қыркүйек айында Сербияда жалауын көтеретін Әлем чемпионаты күтіп тұр. Ол жарыста да шәкірттеріміз аянып қалмай, барын салатын болады,- деді Қайрат Еркінжасұлы.
Спортшыларды кезекті жеңістерімен құттықтаған қала басшысы байрақты бәсекелерден жүлдемен оралып жүрген саңлақтарға үнемі қолдау білдіретінін жеткізді.
— Біз әрдайым қолдан келгенше спортшыларымызға көмек беруге әзірміз. Себебі Мемлекеттік Ту екі жағдайда ғана көтеріледі. Ол Мемлекет Басшысының шетелге сапары кезінде және спортшыларымыз жеңіске жеткен сәтте. Менің бір байқағаным — семейлік өрендердің бойында жеңіске деген ерекше жігер бар. Әрине, бапкерлердің де атқарған еңбегі ұшан-теңіз. Ең бастысы, әрқашан жұртшылықты осындай жақсы нәтижелеріңізбен қуанта беріңіздер. Мерейлеріңіз үнемі үстем болсын,- деген тілегін жолдады Ермак Бидахметұлы кикбоксинг майталмандарына.
Жақсылық МҰРАТҚАЛИ, «Семей таңы»
