Семей қаласының әкімі Ермак Сәлімов ғасырға жуық тарихы бар, іргетасын Алаш арыстары қалаған «Семей таңы» — «Вести Семей» газеттерінің редакциясында болып, қалам ұстаған қауымның тыныс—тіршілігімен танысты.
Басылым редакциясында Ермак Бидахметұлы алдымен газеттің тарихымен танысып, қазақ баспасөзінің қара шаңырағында қызмет еткен тұлғалар жайында мағлұмат алды. «Семей таңы»- «Вести Семей» газеттерінің директор — бас редакторы Риза Молдашева басылымның негізін Жүсіпбек Аймауытов, Мәннан Тұрғанбаев, Шаймардан Тоқжігітов сынды Алаш арыстары қалағаны жайлы айта келе, осы ғасырға жуық уақытта газетте еңбек еткен редакторлар мен қаламгерлер туралы мәлімет берді.
{jcomments on}Газеттің алғашқы редакторларының бірі Мәннан Тұрғанбаев, Шаймардан Тоқжігітов болды. Одан кейін Жүсіпбек Аймауытов, Мұхтар Әуезов сынды ұлт зиялылары да газеттің жарыққа шығып, халыққа таралуына заманында сүбелі үлестерін қосты. Сондай-ақ Жұмажан Тәттібаев, Сағат Жұмағазиев, Хасен Өзденбаев, Беген Байсақалов, Қарқабат Байкенов, Рысхан Мусин сияқты есімдері Қазақстанға белгілі адамдар газетке басшылық жасады. Жалпы, «Семей таңында» республикаға есімдері белгілі қаламгерлер еңбек еткеніне қала әкімі редакция мұрағатымен танысу барысында көз жеткізді.
Сонымен қатар «Семей таңы» газетінің тарихы былтырғы жылы желтоқсан айында өткен газеттің 95 жылдығында елімізге белгілі алаштанушы ғалымдардың дәйекті дәлелдері, пайымды пікірлері негізінде 1917 жылдан басталатыны дәлелденіп, тарихтың қалыпқа келгенінен де қала әкімі хабардар болды. Сонымен, 2017 жылы газеттің ғасыр тойы аталып өтіледі.
Редакция жұмысымен танысу мақсатында қала әкімі газет ұжымындағы журналистермен жүздесіп, пікір алмасты. Атап айтқанда, әкімдік пен редакция арасында тығыз әріптестік байланыс негізінде билік тарапынан атқарылып жатқан жұмыстарды халыққа жылдам әрі объективті түрде жеткізу, мемлекеттік бағдарламалардың Семей өңірінде орындалуы сияқты ауқымды мәселелер төңірегінде ой бөлісті.
Ермак Бидахметұлы Мемлекет басшысы Н. Назарбаевтың сарабдал саясатының халыққа шынайы жеткізу бағытында ақпарат құралдарының маңызды міндет атқаратынын айта келіп, алдағы уақытта қалам ұстаған қауымның тәуелсіз еліміздің тұрақтылығы жолында аянбай еңбек етіп, оқырмандарға шынайы ақпарат беруі тұрғысында табыс тіледі.
Асан МЫРЗАХАНОВ, «Семей таңы»
