Бейсенбі күні Үкіметтің селекторлық отырысы өтіп, онда тамыздың 20-сынан бастап теңге бағамының еркіне жіберілгені хабарланды. Осылайша, Қазақстан әлемдік дағдарысты айналып өту жолын өзінше таңдап отыр. Әрине, қарапайым халық ел үкіметінің мұндай қадамға не үшін барғанын білмей алаңдауы мүмкін. Мұндайда оған шетел валютасын алып — сатарлар да өз үлестерін қосып жатады. Ал экономикалық тұрғыдан саралап қарайтын болсақ, бұл дұрыс жолдың бірі болып отыр. Өйткені енді теңге бағамы нарықтағы ұсыныс пен сұраныс негізінде қалыптасады. Табиғи жолға түседі.
Қалыптасқан ахуалға байланысты экспорттаушы компаниялар басшыларының қатысуымен өткен жиында Елбасы дүниежүзілік дағдарыстан ешкім де тыс қалмайтынын айтып, соңғы жылы әлемдік экономикалық ахуал едәуір төмендегенін жеткізді.
«Барша дүниежүзінде экономиканың нашарлағаны бәрімізге көрініп отыр. Дағдарыс барлық бағытта, яғни шикізат тауарларына, валюта, қаржы нарықтарына әсер етуде. Бұл — дамушы және дамыған мемлекеттерде орын алып отырған жағдай. Шикізат тауарларына баға барша әлемде төмендеді, сондықтан біздің бюджетке түсетін қаржының ауқымы едәуір төмен болды. Біз бұрын мұндай жағдайлардың талайынан өтіп келе жатырмыз», — деп еске салып өтті Президент.
Осы орайда Елбасы одан бері бірқатар дағдарыстар орын алғанын, алайда Қазақстан осы сын-қатерлердің барлығын еңсергенін атап өтті.
«Қанша бағдарламалар жасасақ та, өмір мен жағдай алдымыздан қиыншылықтарды алып келеді. Қазір де осындай қиыншылыққа тақап тұрмыз. Бұл дүниежүзілік дағдарыстан ешкім де тыс қалмайды. Қазақстан — әлем мемлекеттерімен, экономикалармен байланысы бар ел. Сондықтан бұл дағдарысқа алдын ала барлық жағынан дайындалып, еңсеруіміз керек», — деді Мемлекет басшысы.
Өз басым алдағы уақытта ахуалдың тұрақтанатындығына сенімдімін. Әрине, бұл бұқараға ықпал етіп, белгілі бір алаңдаушылық туындатады. Бірақ ел болашағы үшін, қазақстандықтар осы өтпелі кезеңді еңсеру үшін түсіністік танытулары қажет. Тәуелсіздігіміз баянды болса, төл теңгеміздің басындағы бағы қайта айналып қонатынынан үмітімізді үзбейік.
Бейсенғазы ТАСТЕКЕЕВ, Семей қалалық мәслихатының депутаты.
