Әрине, доллар бағасы қымбаттап, әлемдік дағдарыстың есігімізді бір күні келіп қағатыны жайлы Елбасымыз бұдан бұрын да ескертіп, халыққа дайын болуға құлаққағыс жасалған. Бұл — тек Қазақстанда ғана емес, бүкіл әлемде орын алып жатқан құбылыс. Экспорттаушы компаниялар басшыларының қатысуымен Ақордада өткен кеңесте Мемлекет басшысы бұл дағдарыстан әлемде ешбір елдің тыс қалмайтынын және еліміздің мұндай жағдайларды осыған дейін де бастан өткізіп келе жатқанын айтты. Ол — шындық. Талай қиындықтан жол тапқан еліміздің бұл сыннан да сүрінбей өтеріне сенімдіміз. Сондай—ақ ҚР Премьер—министрі Кәрім Мәсімов Үкіметтің селекторлық отырысында жаңа оқу жылының басталуы қарсаңында әлеуметтік жағынан аз қамтылған отбасыларға берілетін көмекті көбейтуге тапсырма берді. Бұл жөнінде ҚР Президенті жанындағы ОКҚ—нің брифингінде ҚР ҰЭМ Ерболат Досаев:
“Жаңа саясатқа көшкеннен кейін, Үкіметтің отырысында жергілікті әкімшіліктердің барлығына ҚР Премьер-министрі тапсырма берді. Қолымыздан келгенше бәріне көмек береміз. Жыл сайынғы берілетін әлеуметтік көмектерді көбейтіп, әлеуметтік жағынан аз қамтылған отбасыларға жаңа оқу жылының басталуы қарсаңында арнайы көмек беретін болды”, — деген болатын.
Демек, жаңа оқу жылы қарсаңында оқулықтардың бағасы өзінің бұрынғы құнын сақтайтын болады. Сондықтан ата-аналардың, жалпы жұртшылықтың алаңдауына еш негіз жоқ.
Таяқтың екі ұшы бар болса, бұл дағдарыстың да, яғни доллар бағасының өсуінің де тиімді жақтары бар екенін айтады экономистер. Әлбетте, оның бәрі уақыттың еншісінде екені даусыз. Бастысы, даурығудың еш қажеті жоқ. Елбасы Нұрсұлтан Әбішұлы Үкіметке еліміз бойынша, барлық қиындықтарға қарамастан, тауар бағаларының тұрақты болуын қатаң қадағалау туралы тапсырма жүктеген болатын. Елбасының тапсырмасын орындай отырып, ел болып, жұрт болып, жұдырық болып жұмылып, барлық қиындықтарды бірге еңсеруіміз керек.
Жұмағазы СТАМБЕКОВ,
№ 37 мектеп-гимназиясының директоры.
