Теңгенің нарықтағы бағасының өзгеріске ұшырауына байланысты Мемлекет басшысы облыс, қала және аудан басшыларына халықтың күнделікті тұтынатын тауарлар бағасының күрт өсіп кетпеуін қадағалауда ұстауды тапсырған болатын. Осы ретте азық—түлік бағасының тұрақтылығын қалалық кәсіпкерлік бөлімі қатаң бақылауында ұстап, арнайы штаб та құрылған. Штаб құрамына қала әкімінің орынбасары, қалалық кәсіпкерлік, ауылшаруашылық, ішкі саясат бөлімдері, мемлекеттік кіріс басқармасы, ішкі істер органдары мен тұтынушылардың құқығын қорғау ұйымдары енгізілген.
{jcomments on}Өткен жұма күні бұқаралық ақпарат құралдары өкілдері штаб мүшелерімен бірге мониторинг өткізуге қатысып, бағаның тұрақты екеніне көз жеткізді. Мысалы, «Тамаша» супермаркетінде 21 тамыз күні азық-түлік бағасы бұрынғы қалпынан еш өзгермеген. Тұтынушылар тарапынан да ешқандай наразылық орын алмады.
— Күніне екі рет 14 маман бағаға мониторинг жасап отырады. Егер мониторинг барысында бағаның өсуі байқалса, сауда мекемелерінің жетекшілерімен сұхбат жүргізіледі. Әсіресе әлеуметтік тауарлардың бағасы қатаң бақылауға алынады. Бұған 27 тауардың тізімі енгізілген. Оның басым көпшілігі – отандық өнім. Өткен жылы девальвация болғанда да, бағаның тұрақтылығы бір жыл бойы сақталған болатын, — дейді кәсіпкерлік бөлімі басшысының міндетін атқарушы Бауыржан Юсупов.
Сондай-ақ Бауыржан Юсупов өзге де тауарлардың бағасы бақылауда болатынын, доллар бағамының жоғарылағанына дейін импортталып келген өнімдер бағасының бұрынғы қалпын сақтайтынын айтып өтті.
Мамандардың айтуынша, қаладағы 900-ден аса кәсіпкер әлеуметтік қажетті тауарлардың бағасын 10 пайыздан жоғары көтермеу туралы меморандумға қол қойған. Аталмыш меморандумның уақыты шектеусіз екенін ескерсек, бұл да бағаның тұрақты болуына септігін тигізетіні анық. Сондай-ақ баға тұрақтылығына қоймасында 25 мың тонна жеміс пен көкөніс сақтауға қауқарлы тұрақтандыру қорының да әсері зор болмақ.
Ал жексенбі, 23 тамыз күні қала әкімінің орынбасары Нариман Ақылжанов бастаған штаб мүшелері шаһардағы бірқатар сауда орындарын аралады. Сатылымдағы тауарлар бағасында өсім байқалмайды. Өйткені азық-түлік қорының басым бөлігі — отандық өнім. Ас атасы – нан бағасы да тұрақты.
Шаһар кәсіпкерлерімен жүзбе-жүз тілдескен Нариман Егізбайұлы бизнес өкілдерін әлеуметтік жауапкершілік танытып, тұтыным тауарлары құнының көтерілуіне жол бермеуге, сондай-ақ өтпелі кезеңде жұдырықтай жұмыла білуге шақырды.
Семейде арнайы құрылған штаб өкілдері күніне екі рет сауда орындарын аралауда. Осылайша жергілікті атқарушы билік қала дүкендері мен сауда орталықтарын бақылауға алған. Әзірге азық-түлік бағасында ешқандай өзгеріс жоқ. Ал валютаға енгізілген түзетулерді пайдаланып, табысқа кенелмек болғандарға шара қолданылмақ.
— Арнайы құрылған жедел топ күнделікті қаладағы 300 дүкенді, базарлар мен ірі-ірі сауда орындарын бақылап, мониторинг жүргізуде. Өздеріңіз байқағандай, бағаның өсімін көріп отырған жоқпыз. Алдағы уақытта да барлығы бақылауда болып, жұмыстар жалғасын табатын болады. Тіпті бірқатар кәсіпкерлер әртүрлі жеңілдіктер де ұсынып отырғанын көріп тұрмыз. Бізге күріштің бағасы 300 теңгеге көтерілгені жөнінде шағым болды. Ал «Адал» супермаркетінде оның бағасы 230 теңгемен саудалануда, — дейді Семей қаласы әкімінің орынбасары Нариман Ақылжанов.
А. МЫРЗАХАНОВ,
Н. КӘКІШЕВ,
«Семей таңы»
