ҚР Ұлттық кәсіпкерлер палатасының облыстық филиалы, «Даму» кәсіпкерлікті дамыту» АҚ және “Parasat Consulting” ЖШС-нің өкілдері Семейде кәсіпкерлік белсенділікті арттыру және «Бизнестің жол картасы — 2020» мемлекеттік бағдарламасын іске асыру шеңберінде бизнес рейд өткізді.
{jcomments on}Кәсіпкерлік салада мол тәжірибесі бар менеджерлерден жасақталған топ құрамы алдымен «Ақшың» сауда орталығына барды. Мұнда білікті мамандар шағын және орта кәсіпкерлік субъектілеріне шаруаларын дөңгелетуге септігін тигізетін мемлекеттік бағдарламалардың тиімділігін түсіндіріп өтті. Арнайы топтың жетекшісі, кәсіпкер Саят Есенгужанов келтіргендей, бүгінде елімізде кәсіпкерлердің белсенділік көрсеткіші төмен деңгейде екен. Ал мұндай шаралар олардың бизнеске деген құлшынысын оятып, кәсібінің нәсібін көруге сеп болмақ. Әрі осындай басқосулар нәтижесінде шағын бизнес өкілдері жұмыс орнынан алыстамай-ақ, өздерінің көкейінде жүрген түйткілді сауалдарын қоюға мүмкіндік ала алады. Бұдан бөлек сауда орталығында кәсіпкерлерге мемлекеттік бағдарламалар арқылы берілетін жеңілдетілген несие жөнінде ақпараттық кітапшалар таратылды.
Сонымен қатар азаматтарға маркетинг, бизнесті жоспарлау, салық салу мен құқықтық сұрақтар төңірегінде кеңестік қызметтер де көрсетілген екен. Рейд барысында саудагерлер осындай пайдалы шараның өткізілуіне ризашылық білдіріп, алдағы уақытта да осы бағыттағы оңды істер жалғасын тапса екен деген тілектерін жеткізді.
— Сауда саласында жүргеніме 20 жылдан артық уақыт болды. Бұрындары мұндай акциялар өткізілмейтін. Көптеген мәліметке қанықтым. Әсіресе ісін енді бастап жатқан тұлғаларға бизнес жоспар құру шаруаларын өркендетуге көп пайдасын тигізетіні сөзсіз. Бұдан өзге тиімді мемлекеттік бағдарламалар да бар екен. Мысалы, осындай білікті жастар келіп ол туралы айтпаса, біз ол жөнінде мүлде білмес едік. Пайыздық мөлшері аз, жеңілдетілген несие алуға болатыны тіпті қуантты. Көбіне жұмыста жүргендіктен, біздің арнайы мекемелерге барып кеңес алуға уақытымыз жетпей жатады. Кезінде біз жоғары пайыздық мөлшермен несие алған едік. Ол жылдары дәл осындай шарапаты мол бағдарламалар болған емес. Сондықтан да бұл- кәсіпкерліктің алға басуына сеп болатын таптырмас мүмкіндік. Мұндай тиімді сәтті жіберіп алмаған ләзім, — дейді шағын кәсіпкер Елена Янцен.
Бизнес рейдтің соңында ұйымдастырушылар аталмыш бағыттағы жұмыстарды өзге де сауда нысандарында өткізу көзделіп отырғанын жеткізді.
Ж. СҮЛЕЙМЕН,
«Семей таңы»
