Баға тұрақтылығын бақылау мақсатында «Нұр Отан» партиясының фракция мүшелері қаладағы бірқатар дүкендерге рейд жүргізді. Рейд барысында қалалық мәслихат депутаттары Бейсенғазы Тастекеев пен Динара Әбдрахманова және Достық үйіндегі орыс ұлттық әлеуметтік-мәдениет орталығының төрайымы Надежда Козырева әлеуметтік маңызы бар тауарлардың бағасын қадағалады.
Жұмыс тобы тексерісті ең алдымен сол жақ жағалаудағы «Южный» дүкенінен бастады. 26 тамыз күнгі бақылау жұмыстарының мәліметтеріне қанық болған халық қалаулылары мен партия өкілдері сөрелердегі азық-түлік бағаларын қолда бар ақпараттармен салыстырды. Бұл жерден кейін жұмыс тобы «Юбилейный» дүкеніне ат басын бұрды. Сонымен қатар баға тұрақтылығын бақылаушылар «Жаңа Көктем» және «Родина» сауда үйлерінде де болып, ондағы тауар бағаларының бағамымен танысты.
Барлық сауда орындарында жағдайды бірдей деп айтуға келмейді. Тексерушілердің келетінін білген кейбір саудагерлер бағаны әдейі төмендетіп қойған көрінеді. Бұдан бөлек сөрелерден бағасы көрсетілмеген тауарларды да кездестіруге болады. Мысалы, дүкендерде қанттың бағасы 180 теңгені құрайды екен. Алайда қанттың бағасы кейбір дүкендерде жазылып көрсетілмеген. Соған қарағанда, сатушылар тұтынушыларға өз ойларындағы бағаны айтып қалатын көрінеді. Дегенмен заңсыздықтар тиісті органдарға хабарланып, алдағы уақытта нақты шара қолданатындарын айтады мәслихат депутаттары.
— Дүкендердегі кейбір саудагерлердің тауар бағасын жазып көрсетпеулері, әрине, заң бұзушылық. Тұтынушылар бағаны сатушының аузынан естімеуі керек, сөреде тұрған бағаны өздері көруі қажет. Мұнымен енді тиісті органдар айналысады. Әзірге бағалардың көтеріліп кеткені байқалмады. Дегенмен баға тұрақтылығын әлі де бақылып отыру керек, — деген қалалық мәслихаттың депутаты Бейсенғазы Тастекеев, — доллар бағамының көтерілуі, әрине, кәсіпорындарға, жекелеген кәсіпкерлерге тиімді. Алайда кәсіпкерлер осы сәтті пайдаланып, бағаны қалауларынша көтермеуге тиіс. Үкімет тарапынан кәсіпкерлікке қаншалықты қолдау болса, кәсіпкерлер де халықтың жағдайын соншалықты ойлаулары керек, — дейді.
Бағаны бірқалыпты ұстап тұру өте маңызды екенін, алайда қаладағы барлық сауда нүктелерін тұрақты түрде бақылау мүмкін емес екенін, сондықтан бұл жұмыста сатып алушылардың да көмегі қажеттігін айтады депутаттар. Егер де тұтынушылар бағаның негізсіз көтерілуіне куә болып жатса, 56-83-94 телефон нөмірі арқылы «Нұр Отан» партиясының қабылдау бөліміне немесе баға тұрақтылығын қадағалайтын арнайы штабқа хабарласуларына болады.
Нұрдәулет КӘКІШЕВ, «Семей таңы»
