Қазақстан Республикасының Конституциясы күні — еліміз бойынша жыл сайын жоғары деңгейде аталып өтілетін жалпыхалықтық мереке. Әсіресе қабылданғанына 20 жыл толатын ағымдағы жылы бұл мерекенің мән-маңыздылығы тіптен арта түскен. Себебі егемендігіміздің осынау кезеңінде Ата Заң аясындағы атқарылған істер сарапталып, тәуелсіздігімізді тұрақты етуде елеулі үлесі бар төл Заңнамамыздың ел өмірінде жарқын көрініс табуына ықпал еткен азаматтар құрметтеледі.
Ата Заңның айбынын асқақтатуда әр салада жүріп, жемісті қызмет ету арқылы үлес қосқан семейліктердің қатары мол. Апта сейсенбісінде қалалық әкімдікте өткен басқосуда шаһар басшысы Ермак Сәлімов бұл жайында кеңірек тоқталып өтті. Іргелі жиынға өңірімізде еңбек ететін әртүрлі мамандық өкілдері – ғалымдар, дәрігерлер, құқық қорғау саласының өкілдері, ұстаздар, ардагерлер, мемлекеттік қызметкерлер жиналған болатын.
{jcomments on}Басқосуда құттықтау сөз алған Ермак Бидахметұлы аталмыш мерекенің маңыздылығын, ел Конституциясының тәуелсіздігімізді тіктеп, байтақ Отанымыздың өркендеуі жолындағы ықпалын атап өтті.
— Қазақстан Республикасы Конституциясы — еліміздің басты мерекелерінің бірі. Осы орайда 5 тамыз күні ел Президенті «Қазақстан Конституциясына 20 жыл» мерейтойлық медалімен марапаттау туралы Жарлыққа қол қойған болатын. Бұл құрметке біздің қаламыздың да азаматтары лайық. Сіздердің алдарыңызда сол адамдарға марапатты табыстауға рұқсат етіңіздер, — деді.
Қазақстан Республикасы Конституциясының құзыреттілігін қамтамасыз етуге, елдің Тәуелсіздігін, Қазақстан қоғамындағы келсім мен тұрақтылықты нығайтуға, азаматтардың конституциялық құқықтарын қорғауға қосқан үлесі үшін, сондай-ақ Қазақстан Конституциясының 20 жылдығы құрметіне орай, салтанатты түрдегі марапаттау рәсіміне кезек берілді. Абыройға ие етер марапат алдымен осы кезеңге дейінгі сіңірген адал еңбегі үшін қалалық мәслихаттың хатшысы Бейсенбек Ақжаловқа және қала әкімінің орынбасары Нариман Ақылжановқа табыс етілді. Сонымен қатар ішкі саясат бөлімінің басшысы Айдар Садырбаев та марапатталды. Бұдан өзге де бірқатар бөлім басшылары құрметке лайық деп танылыпты. Мереке қарсаңында мерейге кенелгендер арасында медицина саласының мамандары мол екен. Атап айтсақ, Семей қаласы медициналық жедел жәрдем станциясының директоры Николай Мантлер, балалардың туберкулезге қарсы күрес ауруханасының меңгерушісі Насира Жақсылықова, перинаталдық орталық директоры Архат Құдайбергенұлы мерекелік медаль иегерлері атанды. Ал ауыл әкімдері арасында Ертіс ауылдық округінің әкімі Зылиха Межекенова, Шүлбі кентінің әкімі Лилия Гребельная құрметке кенелді. Марапатталған жандар арасында қалалық ардагерлер кеңесінің төрағасы Амантай Доғалақов та сөз алып, барша жиналған қауым мен марапат иелерін құттықтап, ізгі тілек те білдіріп өтті.
Сонымен қатар Семей қаласы әкімі аппаратының басшысы Зәуреш Исабаева «Қазақстан халқы Ассамблеясына 20 жыл» мерекелік медалімен марапатталды. Салтанатты жиын соңынан барша марапат иелері естелік фотосуретке түсті.
Қуаныш ЖОЛЫМБЕТ,
«Семей таңы»
