Қазақстан Республикасының Конституциясы күні, анығырақ айтқанда, аталмыш мерекенің 20 жылдық мерейтойы аясындағы бірқатар шаралар семейлік жұртшылық үшін тосын тартуларға толы болғаны анық. Сондай соны сипаттағы оқиғалардың бірі аптаның соңғы жұмыс күнінде Семей қаласының № 2 ХҚКО-да өтті.
Дәл осы күні аталмыш орталықтан кәмелеттік жасқа толып, ересектік өмірге қадам басқан үш бірдей қалалық бойжеткен қолдарына жеке бас куәліктерін алды. Айта кетер ерекшелік сол- үшеуі де дәл ҚР Конституциясы күнінде, яғни 1999 жылдың 30-шы тамызында, өмірге келгендер екен. Жүздері бал-бұл жанған Әнел Нұрмұхаметова, Дарина Қазыкенова мен Айжан Адишеваларға дәл осы күні Семей қалалық ішкі істер басқармасының көші-қон полициясының бастығы С.Көпесовтің салтанатты түрде жеке басты куәландыратын құжаттарын табыс етті.
— Бұл мереке барша қазақстандықтар үшін ерекше маңызға ие. Тәуелсіз еліміздің ішкі тұрақтылығын қамтамасыз етіп қана қоймай, оның әр азаматының құқықтық өмірін де қамтамасыз етуде ерекше орны бар төл Конституциямыздың күнімен баршаларыңызды құттықтаймын, — деп атап өткен құзырлы орын басшысы бойжеткендерге куәліктерін табыс етті.
Өз кезектерінде бойжеткендер де жылы лебіз білдірді. Атап айтсақ, Дарина Мұратқызы төл куәлікке қол жеткізу әр адамның өміріндегі басты маңыздағы оқиғалардың бірі деп санайтынын айтады. Ол жоғары оқу орнына түсіп, болашақта журналист болуды армандауда.
Құжат алушы қыздармен бірге салтанатты шараға олардың туыс-тары мен ата-аналары да келген екен. Мереке күніне орай ұйым-дастырылған шара үшін алғысын білдірген Даринаның анасы перзентін өмірге әкелген күнді де есіне алды. Дәл ҚР Конституциясы күні сәбиіне өмір сыйлаған ананы перзентханадағы дәрігерлер мен өзге аналар да құттықтаған екен.
— Еліміздің ерекше маңыздағы мейрамдарының бірі болғандықтан да, бұл күн әр қазақстандық үшін қымбат. Сол тәрізді семейліктер үшін де ерекше мәнге ие. Ал осы күні қала тұрғындарын, әсіресе үлкен өмірге енді қадам басып жатқан жас буын үшін тәрбиелік маңызы бар шараны ұйымдастырғандарға аналық алғысымды білдіремін, — дейді қуаныштан толқып тұрған Даринаның анасы.
Расында, бұл күн үшеуінің де жадында жарқын сәттердің бірі болып мәңгілікке сақталатыны анық.
Қ.ӘЛІМБЕК,
Семей қаласы.
