Өткен аптаның жұмасында қала әкімдігінің кезекті отырысы болып өтті. Қала әкімі Ермак Сәлімов жиын басында бір топ мемлекет қызметкерлеріне ҚР Конституциясының 20 жылдығына арналған төсбелгі табыс етті.
Қала басшысы Ермак Бидахметұлы күн тәртібіндегі тақырыптарға тоқталып, бөлім басшыларының есебін тыңдады. «Үкіметтік емес ұйымдар мен этносаралық және конфессияаралық келісімді нығайту жөніндегі жұмыс» туралы қалалық ішкі саясат бөлімінің басшысы Айдар Садырбаев ауқымды мәлімет жасап, атқарылған істерге тоқталды. Қала көлеміндегі 19 мұсылмандық, 4 христиандық, тағы да басқа діни бірлестіктер мен бөлім арасында жүйелі байланыс қалыптасқаны айтылды. ШҚО әкімдігінің қаулысымен 9 орында діни әдебиеттер мен ақпараттар таратылса, 6 орында діни салт-дәстүрлерді орындауға жағдай жасалған. Ұлтаралық және конфессияаралық келісімнің сақталуын қамтамасыз ету бағытындағы ақпараттық-насихат жұмыстарын жыл сайын жаңа қырынан толықтыру көзделген. Түсіндіру жұмыстары мемлекеттік қызметкерлер, зиялы қауым және дін өкілдерінің белсенділігімен кең қамтылып отыр. Насихат тобының құрамы 21 адамға жеткен және жыл басынан бері түрлі деңгейде 57 іс-шара жүзеге асырылған.
{jcomments on}Сол секілді үкіметтік емес ұйымдармен арадағы байланыс орнықты. Олар ішкі саясат бөлімінің мемлекеттік-әлеуметтік тапсырыстарын жүзеге асыру мақсатында биылғы жылға 1млн. 250 мың теңгенің жұмысына ие бол-ған. Әлеуметтік зерттеулердің көрсеткіші бойынша, қаладағы конфессияаралық қатынас 90,6 пайызды көрсетіп, оң бағаланған. Ел ішіндегі тұрақтылық пен тыныштықты нығайта түсуге жастар қауымы да өз үлестерін қосуда. «ШҚО Жастар және балалар ұйымы Ассоциациясының» Семей филиалы жаз маусымында 5 ауылдық округте «Дін және Дәстүр» тақырыбында насихат жұмыстарын жүргізіп қайтқан. Жылжымалы үгіт тобына 300-дей жас белсенділік танытқан.
Ішкі саясат бөлімінің жетекшілігімен атқарылған осы және басқа да жұмыстар есеп барысында айтылып өтті. Аталған тақырып аясында Бұқаралық ақпарат құралдарының тұрақты қызмет жасауы, ұлттық орталықтар мен діни бірлестіктердің белсенділігі қоғам тұрақтылығына үлкен үлес қосып келеді. Қорыта айтқанда, Қазақстан Республикасында терроризмге және діни экстремизмге қарсы әрекет бойынша 2013-2017 жылдарға арналған мемлекеттік бағдарламаның жекелеген бағыттарын жүргізу істері қалалық мәслихатта, терроризмге қарсы комиссия отырысында және әкімдік жанындағы діни байланыс бойынша бірлестік кеңесінде талқыланып отырады.
Келесі тыңдалған есеп «Қала мектептерінің жаңа оқу жылына дайындығы туралы» болды. Білім бөлімі басшысының орынбасары Наталья Тегай биылғы оқу жылына жалпы білім беретін 70 мекеменің ішінде мемлекеттік жалпы білім беретін мектептердің саны 65 екенін атап өтті. Олардың ішінде 22 мектеп мемлекеттік тілде білім берсе, 9 мектеп орыс тілінде сабақ жүргізеді. Қалған 34 мектеп — «аралас» деген дәрежені еншілегендер. Жаңа оқу жылына мектепке тартылған оқушылар қатары 39 787 баланы құрайды. Бұл көрсеткіш бұрынғы жылдан қарағанда оқушылар көлемінің 1660 балаға артқанын көрсетеді. Жыл сайын оқушылар санының 1000 — нан астам балаға өсіп отыруы — еліміздегі демографиялық әрі әлеуметтік жағдайдың жақсара түскенінің белгісі. Сол себепті бала санының артуынан туындайтын мектеп өміріндегі мәселелердің алдын алып отыру әкімдік тарапынан мұқият назарға алынған. Нәтижесінде жаңа оқу жылы жоспарланған межеге сай басталмақ. Ауылды жерлердегі және шалғай елдімекендердегі тұрғындардың мектеп жасындағы балаларын сабаққа тартудың барлық мүмкіндіктері қарастырылған. Оқулықтарынан бастап қатынап оқитындардың көліктеріне дейін білім бөлімінің қадағалауында. Биылғы оқу жылына 136 млн. 410 мың 557 теңгеге 174 860 дана оқулық жаңадан сатылып алынып, мектептерге үлестірілген. Мектептерге ағымдағы жөндеу жұмыстары жасалған. Үстіміздегі жылдың 14 маусымындағы қатты дауылдан шатырларына зақым келген мектептердің төбе жабындылары жаңартылған. Жылу жүйесі орталықтандырылған 60 мектептің жылу және электр энергиясын қабылдауға әзірлік құжаттары толық дайын. Жекелеген жылу көздерімен қамтылған мектептердің қажетті отындары қарастырылған. 27 шілде мен 12 тамыз аралығында білім және тәрбие ғимараттарының өрт қауіпсіздігі талаптарын орындау мүмкіндіктері тексерілген.
Күн тәртібіндегі үшінші сұрақ тұрғын-үй инспекциясының иелігіндегі жұмыстарға қатысты болды. Бөлім басшысы Светлана Заурбекова қаладағы көп қабатты үйлердің қысқы маусымға әзірлік және тұрғын-үй ережелерінің сақталу деңгейі жөнінде мәлімет берді.
Қала әкімі Е.Сәлімов тұрғындар арасында тәртіп пен ереженің дұрыс сақталуы көптеген мәселенің алдын алатындығын айта келіп, осы бағытта бөлім қызметкерлері қаншалықты ықпалды екенін сұрады. Бөлім басшысы былтырғы жылы 100-ден астам тексерулер жүргізіліп, ереженің сақталмауына қатысты 56 хаттама жасалғанын көлденең тартты. Инспекция құзырындағы негізгі күш те осы хаттама толтыру көрінеді. Алайда заң бойынша тексеру жүргізіп, хаттама толтыру тұрғындардың нақты шағымдары негізінде жүзеге асатындықтан, мүмкіндіктерін толық пайдалана алмайтын көрінеді.
Жиынды қорытындылаған қала басшысы Ермак Бидахметұлы өз пікірін ортаға салды. Тұрғын-үй инспекциясына, хаттамаға қатысты себептерге сүйене берсек, ешқашан тұрғын үй тәртібін ретке келтіре алмайтындықтарын ашық айтты. Білім бөлімінің басшылығына мұғалімдер қауымына коммуналдық қызметке берешек болмауға шақырып, ҰБТ – да төмен балл алған мектеп басшысымен және зейнетке жасы жеткен директорлармен нақты әңгіме жүргізуді тапсырды.
Қала әкімінің баспасөз қызметі.
