Апта сәрсенбісінде Семей қаласының әкімі Ермак Сәлімов шаһардағы жолаушылар тасымалымен айналысатын мекеме басшыларымен арнайы кездесті. Кездесуде қозғалған негізгі тақырып көптен бері қоғамның талқысында жүрген жолақы мәселесі жайында өрбіді.
Қоғамдық көліктер қала тұрғындарына қаншалықты қалтқысыз қызмет етуде? Олардың қызмет көрсету сапасы мен жүру уақыты қандай? Міне, осы төңіректегі туындаған сауалдар негізінде Ермак Бидахметұлы Орталық алаң аялдамасында бір сағаттан аса аялдап, № 35 бағыттағы автобуспен Юбилейныйдан Восходқа дейін жүріп, тұрғындарымен тілдесті, мәселенің мән – жайына қанықты. Осы ретте қала басшысы жолаушылар тасымалымен айналысатын мекемелер жұмысына көңілі толмайтыны туралы пікірін де ашық білдіріп, кіріс көлемін көрсетпей тұрып, жолақыны қымбаттатуға ешқандай негіз жоқ екенін де мәлім еткен болатын.
{jcomments on}Жергілікті билік тарапынан жолаушылар тасымалымен айналысатын мекемелердің жұмысын жіті қадағалауға алып, жүгенсіздікке жол бермеу мақсатындағы шаралар осылайша басталған еді. Ал апта сәрсен-бісіндегі кездесу болса жолаушы тасымалдаушы мекеме басшыларын ашық конструктивті диалогке шақырумен ерекшеленді. Бұған дейін Семей қаласының ақпараттық орталығында өткен баспасөз мәслихатына бір ғана тасымалдаушы мекеме басшысының орынбасарынан басқасы төбе көрсетпеген болса, бұл жиыннан ешқайсысы да шет қалмады. Алдымен Ермак Бидахмет-ұлы бұл мәселені мұқият әрі жан – жақты зерделей отырып шешу керектігін айтып, қаладағы 50 бағыт бойынша қоғамдық көліктердің қозғалысы бақылауға алынғанын жеткізді.
— Қандай да бір бизнес субъектісі өз қызметінде бағаны көтерместен бұрын, экономикалық жағынан тұшымды дәйек келті-руі тиіс. Ал қоғамдық көліктерде жолақыны көтеру мәселесінде, тағы да қайталап айтқым келеді, көп жағы бізге беймәлім әрі түсініксіз күйінде. Сол себепті құрамында 18 адамнан тұратын жұмыс тобын құруға тура келді. Оның құрамына қоғамдық ұйымдар мен мемлекеттік органдардың өкілдері және осы процеске қатысы бар мекемелердің мамандары кіріп отыр. Алдағы уақытта олар арнайы кешенді жұмыс атқа-ратын болады. Ол үшін ең алдымен күнтізбелік жоспар бекітуіміз керек. Сондай-ақ тасымалдаушы мекемелердің өткен жылғы шығын көлеміне сараптама жасалуы қажет. Бұл орайда олар әр бағыттың шығын мөлшерін нақты көрсетуі тиіс. Әр жұмыс күнінің соңында хаттама толтырылатын болады. 13 қазанда атқарған шараның қорытындысын шығаруды көздеп отырмыз. Мұндай қадам айналып келгенде, нақты жолақы бағасын орнату мақсатында керек. Егер де жұмыла кіріссек, жоспарымызды мерзімінен бұрын аяқтауымыз ықтимал. Оның барлығы сіздер мен біздің ауызбіршілігімізге байланысты болмақ,- деді Ермак Бидахметұлы.
Сонымен қатар жиында қоғамдық көліктердің қозғалыс кестесін қадағалауда студент жастардың көмекке келетіні мәлім болды. Мұндай бастама шаһардағы жоғары оқу орындары мен колледж басшыларынан да қолдау тауыпты. Осы ретте кейбір тасымалдаушы мекемелер өкілдері студенттердің мұндай шараға қатысуына өз қарсылықтарын білдірген сыңай танытты. Ермак Бидахметұлы, керісінше, жастардың жүктелген міндеттің жедел орындалуына ықпалын тигізетінін тілге тиек етті. Сондай –ақ жолаушы тасымалдаушы мекемелердің басшыларына кіріс пен шығыстың нақты мөлшерін айқындайтын құжаттарды жеделдетіп әзірлеуді тапсырды.
— Әлбетте, кіріс және шығыс мөлшерлері көрсетілген құжаттарды біздің білікті мамандарымыз зерделейтін болады. Сіздер жолақыны көтерер сәтте үнемі шығын жағын ғана көрсетесіздер. Ал кіріс көзі жайында нақты мағлұмат жоқ. Сіздерден өздеріңіздің мекемелеріңіздегі өткен жылдың кіріс және шығыс көлемін нақтыланған құжаттарыңызды әзірлеп қоюларыңызды сұраймын, — деді Е.Сәлімов.
Жақсылық МҰРАТҚАЛИ, «Семей таңы»
