Қыркүйектің екінші жұлдызында, апта сәрсенбісінде, Шығыс Қазақстан облысының әкімі Даниал Ахметов жұмыс сапарымен Зайсан ауданына келді. Аймақ басшысы өңірімізде орын тепкен бірқатар кәсіпорындар мен мекемелерді аралап, ауданның тыныс — тіршілігімен танысты. Шығыстың әлеуметтік-экономикалық әлеуетін еселеуде еселі үлесі бар, жаңа инновациялық технологиялар аясында қарқынды дамып жатқан зайсандық зауыттардың қызмет барысына қанықты. Ұжымдармен жүздесіп, аудан еңбеккерлеріне, жергілікті атқарушы билік пен кәсіпкерлік сала өкілдеріне тың тапсырмалар да жүктеді.
Облыс әкімі Даниал Ахметов бұл сапары барысында ең алдымен күллі аймағымыз бойынша әлеуеті жоғары іргелі кәсіпорын «Тарбағатай — Мұнай» ЖШС-де болды. Бүгінде тіпті республика көлемінде алдыңғы қатарлы саналатын іргелі компания менеджері Артур Галустов аймақ басшысын газ өндіру жұмысы туралы ақпараттандырып, соңғы кезеңдерде қолға алынған шаралар барысы жайлы тұшымды мағлұмат берді. Ал зауыт жұмысын, өндіріс орнындағы еңбек қауіпсіздігімен қатар, өнімділікті арттыру бағытындағы ілкімді істерді оң бағалаған өңір басшысы вахталық кентке де ат басын бұрды. Бұл жерде жұмысшылардың еңбек және тұрмыс жағдайымен танысты.
Кез келген өңірді қуатты етуде жеңіл өнеркәсіп саласы жетекші орын алатыны белгілі. Бұл ретте Қарабұлақ ауылдық округіне қарасты балық зауытында болған аймақ басшысы кәсіпорынды жалға алып отырған қытайлық «Таңба Ху» компаниясының жұмысымен танысты. Әлеуеті зор мекеме бүгінде өз өнімдерімен аймақты толық қамтып қана қоймай, сыртқы нарыққа жол салуда. Осы ретте зайсандықтар өнеркәсіп салалары бойынша сыртқы экспортта еселі үлес алуға ынта танытып отыр. Бұл мәселеге тереңірек қаныққан Даниал Кенжетайұлы аталмыш кәсіпорынға еңбек нәтижесіне қарай мемлекет тарапынан көмек көрсетілетінін айтты.
Облыс әкімі бұл сапары барысында әсіресе жергілікті өнім өндірушілерге баса назар аударды. Мәселен, «Зайсан — ТЗ» ЖШС-нің басшысы Ван Чансан 15 қыркүйекте ашылатын ауыл шаруашылығы құралдарын шығарып, трактор құрастыратын шағын зауыт туралы мағлұматпен таныстырды. Оның айтуынша, бұл болашақта ауыл шаруашылығы саласына елеулі түрде көмегін тигізбек.
Осыдан соң аймақ басшысы Кеңсай ауылдық округіне қарасты «Жоңғар» шаруа қожалығындағы соя дақылын өсіретін алқапта болып, агротехнологиялық іс-шаралармен танысты. Даниал Кенжетайұлы жергілікті диқандарға болашақта тамшылатып суару әдісін меңгеріп, суармалы егістік көлемін арттыруды тапсырды.
Сонымен қатар жасанды тоғанда балық өсірумен шұғылданатын «Шығыс» шаруа қожалығында болып, шаруашылық жұмысымен танысты. Балық өсірушілердің жұмысына қызығушылық танытып, сауалдар да қойды. Сондай-ақ жұмыс барысына қаныға келе, болашақта осы жағажайдан ақылы түрдегі балық аулауды ұйымдастыруды неге қолға алмасқа деген ұсынысын жеткізді.
Осыдан кейін Зайсан ауданының орталық ауруханасының кіші диагностикалық орталығында болып, ұжымның жаңа медициналық құрал-жабдықтар арқылы халыққа сапалы қызмет көрсетіп отырғанына қанықты.
Облыс әкімі Зайсан ауданындағы құрылыс алаңдарын да өз назарына алды. Атап айтсақ, Даниал Ахметов осы сапары барысында Зайсан ауданының Сауыр тауы беткейінде орналасқан Сартерек ауылына да ат басын бұрды. Мұнда Сартерек ауылдық амбулаториясын салу жөнінде мәселе қозғап, мердігер компанияға аталмыш нысанды мерзімді уақытында халық игілігіне беру керектігін міндеттеп, арнайы тапсырма берді.
Аймақ басшысы Дайыр ауылында жаңадан салынып жатқан Мәдениет үйінің құрылысымен танысып, жұмыс қарқынына оң баға берді. Осыдан соң «СМУ-Шығыс» ЖШС-нің құрылыс материалдары комбинатында болып, бүгінгі таңда сапалы өнім, жетістікті қызметі арқылы облыс көлемінде танымал болған мекеменің қызметімен танысты. Өндіріс басында жүріп материалдарын көріп, жоғары баға берді.
Зайсан ауданы — әсіресе ауылшаруашылық саласына маманданған өңір. Осы ретте аймақ басшысы өзінің сүт-тауарлы фермалар құру жөніндегі тапсырмасы аясында орындалып жатқан жұмыстармен де тереңірек танысты. Атап айтсақ, сүт өнімдерін өндіріп отырған «Зайсан-Сүт» зауытында болып, өнім өңдеу процесіне куә болды. Бұл жайында оң пікір білдіре келе, халқының басым көпшілігі ауыл шаруашылығы саласымен шұғылданатын ауданда бір сүт зауытының болуын қалыпты жағдайға теңеді. Яғни, кәсіпкерліктің, өндірістің бұл түрінде әлі де болса жаңа жетістіктерді бағындыру қажет.
Облыс әкімі өңірдегі баға тұрақтылығын реттеп, ішкі нарықты тұрақтандыруда жергілікті жерде өндірілетін әлеуметтік азық-түлік тауарларына да назар аударды. Мәселен, тәулігіне 120 тонна ұн шығарып, аудан халқын толықтай ұнмен қамтып отырған «Икеп» шаруа қожалығының астық қамбасында және ұн зауытында болды. Мұндағы жұмыс барысымен таныса келе, болашақта оңтүстік өңірге тасымалданатын әлеуметтік ұн өндіру көлемін тәулігіне 1000 тоннаға дейін жеткізу жайын да айтып өтті. Бұл ретте аталмыш бағытта «Икеп» шаруа қожалығымен жұмыс жасау туралы сала басшыларына арнайы тапсырма берді.
Зайсан ауданын аралай келіп, сапарының соңында қорытынды жасаған аймақ басшысы өңірдегі мұнай-газ саласы бойынша сала мамандарына, жергілікті атқарушы билік өкілдеріне бірқатар тапсырмалар жүктеді. Ал ауыл шаруашылығы жайлы сөз өрбіте келе, өңірде суармалы жерлер мол болғандықтан, бұршақты дақылдар өсіру арқылы жаңа нарыққа жол ашу қажеттігін атап өтті.
Сонымен қатар облыс әкімі Даниал Ахметов шекаралы аймақта орналасқан Зайсан ауданындағы ел игілігін еселейтін жұмыстар жайында сөз ете келе, алдағы жылдарда да осы қарқынмен өсіп-өркендеп, болашаққа еркін қадам басатынына сенім білдіріп, аудандағы атқарылып жатқан жұмыстарға жоғары баға берді.
Ардабек АҚБАБАҰЛЫ,
«Семей таңы»
