Аймағымыздағы маңдайалды электронды ақпарат құралдарының бірі “Қазақстан РТРК” АҚ – ның Семей қаласындағы филиалының эфирден алғаш хабар тарата бастағанына ағымдағы жылдың 1-ші қыркүйегінде 50 жыл толды. Қазақ телевизиясының қалыптасу тарихында айшықты орны бар аталмыш телеарна ұжымын, мерейтойына орай, қала әкімі Ермак Сәлімов бастаған атқарушы билік өкілдері арнайы барып құттықтады.
Ол күндер бүгінде архивтегі бейнетаспаларда сақтаулы, ескірмейтін естеліктерге айналды. Сол жылдардағы Семей облысында тұңғыш рет теле-радио торабының ашылуы өңіріміздегі журналистика саласы үшін елеулі оқиға еді. Байтақ республикада төртінші болып көрермен назарына жол тартқан телестудия аз уақыттың ішінде айрықша ықпалға ие болған. Аталмыш арна бүгінгі таңда да байырғы абырой биігін сақтап келеді. Өңірдегі әлеуметтік-экономикалық өрлеуді, тұрмыс түйткілдерін, шаһар жаңалықтарын шынайы жеткізуде өзіндік аудиториясы қалыптасқан. Сондай-ақ осы ұжымнан шыңдалып шыққан мамандар қазіргі күні Астана, Алматы төрінде, отандық телевизия саласында қарымды еңбек етіп жүр.
{jcomments on}Құрылғанына жарты ғасыр толып отырған мекеменің ықшам тарихы жайлы меймандарға айтып өткен арна басшысы Аманғали Жақсыбаев ұжымның күнделікті қызмет ыр-ғағымен де таныстырып өтті. Қала әкімі Ермак Бидахметұлы операторлар бөлмесі мен эфирлік тетіктер бөлмесі және монтаждау кабинеттеріндегі жұмыс барысына қанықты. Бүгінгі таңда аталмыш телеарна заманауи құрылғылармен толықтай жабдықталған. Бұл жайт өз кезегінде журналистерді шығармашылық тұрғыда жетістікті ізденістерге бастайды.
Қала әкімі сонымен қатар тікелей эфир өтетін арнаулы бөлмеде болып, жаңалықтар тарату үрдісімен танысты. Телеарна басшысының орынбасары Сайра Нүсіпбаеваның айтуынша, бұл студия арқылы тәуліктің кез келген уақытында ақпарат тарата беруге болады екен. Мұнда сурдоаудармашы қызметі сондай-ақ арнайы суфлер де бар. Қала басшысы үлкен және кіші студиялар жұмысына да назар аударды. Бүгінде ұжым әзірлейтін «Орта толсын», «Қайырлы таң», «Кеш емес», «Серпіліс Қазақстан — 2050», «Ойталқы», «Спорт деген бір әлем» сынды телеөнімдер көрермен тарапынан жоғары бағасын алып үлгерген. Сондай-ақ ғаламтор желісінде телеарнаның арнайы сайты да ашылған. Әлеуметтік желілерде жарнамаланатын болғандықтан да, Семей жаңалықтарын әлемнің әр түкпірінен көретіндер көп екен. Бір бұл емес, арна ақпараттарымен сайтқа қалта телефонымен кіру арқылы да танысуға мүмкіндік бар.
Осыдан соң қала әкімі үлкен студияда «Қазақстан-Семей» телеарнасының ұжымымен жүздесті. Қызметкерлерді осынау мерейтойларымен құттықтап өткен Ермак Бидахметұлы жылы лебіз білдірді:
— Сіздердің өңір ахуалы жайлы ақпарат таратудағы айрықша еңбектеріңізді жоғары бағалаймыз. Бүгінгі таңда қоғамдық өміріміздегі, қаламыздағы әлеуметтік климат жайлы объективті мағлұмат алуда сіздердің қызметтеріңіз мақтан етуге тұрарлық, — дей келіп, шағын мерейтойлық сый-сияпаттарын тарту етті.
Өз кезегінде телеарна басшысы Аманғали Жұмағалиұлы да қала әкімінің сөйлеген сөздері мен қатысқан елеулі шаралары жайлы жазылған бейнетаспаны сыйлық ретінде ұсынды.
Ал ұжым мүшелері алдында құттықтау сөз алған қалалық мәслихат хатшысы Бейсенбек Ақжалов қаламыздағы психологиялық, моральдық климаттың БАҚ өкілдері еңбегіне, олар таратқан ақпаратқа да тәуелді екендігін айта келе, шығармашылық табыс тіледі.
Ақпарат айдынында жылдамдығы һәм шынайы мәлімет беруімен де өңіріміз бойынша рейтингі жоғары саналатын телеарнадағы әріптестерімізді мерейтойларымен біз де құттықтап, зор жетістіктер тілейміз.
Қуаныш ЖОЛЫМБЕТ, “Семей таңы”
