Тамыз айында Франция елінде өткен әлем елдерінің «Мәдениет және Дәстүр» атты Халықаралық фестиваліне Семей қаласындағы Шығыс Қазақстан облыстық Әміре Қашаубаев атындағы мемлекеттік филармониясының «Кербез» фольклорлы ансамблі өнер көрсетіп қайтты.
Осыдан 90 жыл бұрын Әміре Қашаубаев салған сүрлеумен өміршең өнер иесі атындағы филармонияның 70 жылдық мерейтойы қарсаңында аталмыш өнер ұжымы Франция елінде бір жарым ғасырға жуық уақыт үзіліссіз өтіп келе жатқан әлем халықтарының мәдениеті мен дәстүріне арналған фестивальға қатысып, халқымыздың төл өнерімен таныстырды.
{jcomments on}Фестивальға, Қазақ елімен қатар, Кения, Эквадор, АҚШ, Аргентина, Лаос, Румыния, Колумбия, Индонезия, Италия, Мексика, Испания сияқты елдер қатысты.
Фольклоршылар фестивалінің ашылу салтанаты Парижден 450 шақырым жерде орналасқан Блан қаласында басталып, Конфоле, Кюганд шаһарларында жалғасын тапты. Біздің өнерпаздар күніне сегіз мың көрерменге концерт қойып, халқымыздың ежелден келе жатқан дәстүрі «Беташар», «Бесікке салу» рәсімін көрсетті.
«Кербез» фольклорлы ансамблінің әншісі Мапруза Өтеуленованың орындауында «Сәулем-ай», «Бипыл», «Дедімай-ау», «Дудар-ай» әндері шырқалды. (Айта кетсек, Мәриям Жәгөрқызы Мапрузаның нағашы әжесі болып келеді). Сонымен қатар хакім Абайдың «Төр жорға» күйі, семейлік композиторлар Кенжебек Алдекеновтің «Жаңа ғасыр» және Рахымбек Ноғайбаевтың «Атамекен» күйлері орындалды. Құрманғазының «Балбырауын» күйі павлодарлық «Шернияз» би тобының мың бұралған биімен көркемделді. Дәулеткерейдің «Қос алқа» күйіне астаналық «Ару-ай» тобының бишілері ұлттық әшекейлерімізді көрсетіп, француздарға оның пәлсапалық, эстетикалық мән-мағынасын түсіндіріп өтті. Концерттік бағдарлама соңында халқымыздың буын биі «Қара жорға» биленді.
Фестиваль соңында «Кербез» фольклорлы ансамблінің жетекшісі Гүлбахрам Мұсабекова, дәстүрлі әнші, Қазақстан Республикасының мәдениет қайраткері Толғанбай Сембаев, Қазақстан Республикасының мәдениет қайраткері, «Шапағат» медалінің иегері Мапруза Өтеу-ленова, дәстүрлі әншілер Алтын Смасейітова, Айжан Салиева, Нұрлан Төкей, Аманғайша Қалиева, Алмагүл Малғаждароваларға арнайы сертификаттар табысталды. Блан қаласының мэрі «Кербез» фольклорлы ансамбліне арнайы Блан қаласының медалін және кітабын табыс етті.
Енді дәстүрлі орындаушыларымыз Бразилия еліне шақырту алып отыр.
Анар ҚУАНҒАЛИЕВА, Семей қаласының мәдениет және тілдерді дамыту бөлімінің бас маманы.
