Облыстық әкімдіктің кеңейтілген отырысында Ауыл шаруашылығы басқармасының мемлекеттік бағдарламаларды жүзеге асыру мәселесі қарастырылды. ШҚО Ауыл шаруашылығы басқармасы басшысының орынбасарының есебін тыңдаған облыс әкімі Даниал Ахметов бірқатар ескертулер айтты.
{jcomments on}Күн тәртібінде «Сыбаға», «Алтын Асық», «Құлан», «Ырыс» мемлекеттік бағдарламаларын жүзеге асыру мәселесі қарастырылды. Бұл туралы Ауыл шаруашылығы басқармасы басшысының орынбасары Ербол Қуанышев баяндады.
— «Сыбаға» бағдарламасы бойынша бүгінгі таңда 5172 бас ірі қара алынса, «Құлан» бағдарламасы бойынша 2265 бас, «Алтын Асық» бағдарламасы бойынша 30600 бас қой алынды. Кейбір аудандарда жергілікті атқару органдары бағдарламаны түсіндіру жұмыстарын нашар жүргізеді немесе мүлде жүргізбейді,- деп атап өтті Ербол Қуанышев.
Ербол Қуанышев есеп беру кезінде «Сыбаға» және «Құлан» бағдарламалары шеңберінде Өскемен және Риддер қалаларында бірде-бір бас ірі қара алынбағанын басып айтты. Осылайша, облыс әкімінің айтуы бойынша, Ауыл шаруашылығы басқармасы басшысының орынбасары өз біліксіздігін көрсетті.
— Ауыл шаруашылығы саласы біліксіз мамандардың кесірінен зардап шекпеуі тиіс. Өздеріңіз ойлап қараңыздаршы, Өскемен мен Риддерге табын керек пе? Олар қай жерде жайылады? Сіздерді жай тыңдап қана қояды екен деп ойламаңыздар. Тапсырмаларды дұрыс тұжырымдап, істің байыбына барыңыздар. Аймақтың барлық мәселелерін бес саусағымдай білемін, сіздер де өз жұмыстарыңызға жауапкершілікпен қарап, мемлекеттік бағдарламалардың жүзеге асырылу барысын, сүт-тауарлы фермалардың жұмысын бақыласаңыздар деймін. 37 сүт-тауарлы ферма құрылуы тиіс. Сіздер аудандармен, ауыл шаруашылығын қолдау қаржы қорымен бірлесіп жұмыс істеп, олардың жұмысын үнемі бақылап, ұйымдастырып тұруларыңыз қажет. Бұл салаға немқұрайлы қарауға болмайды. Немқұрайлы қараудың себебінен жұмыс сапалы жүргізілмейді, — деді Даниал Ахметов.
Отырыс қорытындысы бойынша аймақ басшысы «Ауыл шаруашылығын қолдау қаржы қоры» АҚ қарастырып отырған сүт-тауарлы фермаларды құру туралы мәселені шешуді тапсырды.
ШҚО әкімінің баспасөз қызметі.
