ШҚО әкімдігі және испандық консалтингтік «SOXNA» компаниясы арасында «Реал Мадрид» футбол клубының тәжірибесі бойынша жаттықтыратын 100 орындық футбол академиясының құрылуы жөніндегі меморандумға қол қойылды.
{jcomments on}Облыс әкімі Даниал Ахметовтің тапсырмасы бойынша соңғы айларда футбол академиясының құрылуы жайлы мәселелер қарастырылып, таңдауға неміс және испандық командалардың тәжірибесі алынған. Осы орайда испандық «SOXNA» компаниясымен келісімшарт орнап, испаниялық жаттықтырушылар «Реал Мадрид» командасы тәжірбиесі бойынша жаттықтыратын футбол академиясының құрылысы жоспарланды. Академия Өскемен қаласында жұмыс жасайтын болады. Бастапқыда 12-15 жас аралығындағы 100 бала қабылданып, 50 баладан екі топқа бөлінеді. Әр топта 25 баладан тұратын 2 команда құрылады. Осылайша, 4 команда жұмыс істеп, әр командамен испандық жеке жаттықтырушы жұмыс істейді. Сондай-ақ тәжірибелі шетелдік жаттықтырушылар жергілікті жаттықтырушыларды да жаттықтырмақ. Ал академияға балаларды іріктеу ағымдағы жылдың қазан айынан бастап жүреді.
— Бұл біздің аймақ үшін өте маңызды жоба болғандықтан, академияда балалардың жаттығуына барлық жағдай жасалатын болады. Облысымыздан бөлек, өзге аймақтардан, әсіресе ауылды жерлерден балаларды тартып, академияда тұруы үшін орын бөлеміз,- деді ШҚО әкімі Даниал Ахметов.
Өз кезегінде «SOXNA» компаниясының президенті Алсина Луис облыс басшылығына алғысын білдіріп, жобаның үлкен жетістікке жететіндігін мәлімдей отырып, ШҚО әкімінің орынбасары Жақсылық Омармен меморандумға қол қойды.
Алдағы уақытта балаларды 10 – 16 жас аралығында қабылдап, санын 200-ге жеткізу көзделуде. Ал жаттығу жылдың төрт мезгілінде тоқтаусыз жүруі үшін, төбесі ашылмалы футбол манежы салынады. Айта кетсек, «SOXNA» компаниясы дәл осындай жүйе арқылы әлемнің 10 елімен жұмыс жасауда.
ШҚО Ақпараттық орталығы.
