Теңге бағамының еркін айна-лымға жіберілуі халықтың күнделікті тұтынатын азық — түлік тауарларының бағасын қадаға-лауды талап етеді. Семей қаласында құрылған арнайы штабтан бөлек, БАҚ өкілдері де бағаның негізсіз көтерілуіне жол бермеу мақсатында шаһардағы дүкендерді аралап, баға мәселесіне жіті көңіл бөлуде. Бұл ретте өткен жұма, 18 қыркүйек күні әлеуметтік маңызы бар бірқатар азық-түлік тауарларының бағасын білу мақсатында біздің тілшілер қаланың орталық аумағында орналасқан екі сауда нысанына бас сұқты.
{jcomments on}Алғашқы сауда орны азық-түлікті көтерме бағамен сататын жақында ашылған «Бахус» дүкені болды. Мұндағы азық-түлік бағалары өзге сауда орындарымен салыс-тырғанда әлдеқайда төмен екендігі анықталды. Айталық, мұндағы бірінші сұрыпты жұмыртқаның ондығы 120 теңге, қарақұмықтың келісі 180 теңге болса, күріштің келісін 200 теңгеге, сүтті 180 теңгеге алуға болады. Ал қанттың бағасы көтеріліп, 210 теңгеге саудалануда. Ал екі келі қапталған ұн 200 теңгені, макарон өнімдерінің келісі 135 теңгені, өсімдік майының литрі 230 теңгені құрайды екен.
— Біздің сауда орнында азық-түлік көтерме бағамен саудаланады. Сондықтан да қосылатын үстеме баға бес теңгеден аспайды. Әрине, бүгінгі күні жеткізушілеріміздің көбі бағаны көтермелеп жеткізуге тырысады. Мәселен, соңғы кездері сырттан келетін балық өнімдерінің құны айтарлықтай көтерілді. Кейбір шай түрлеріне де баға көтеріліп отыр. Консервілер мен кейбір сүт өнімдерінің де бағасы қымбаттады. Әрине, үстеме бағаны мейлінше төмендетіп қоюға тырысамыз, алайда диллерлер бағаны көтеретін болса, бізде ешқандай таңдау мүмкіндігі болмай олардың арттарынан жүруге тура келеді, — дейді дүкен иесі Наталья Голубенко.
Ал аталмыш аудандағы «Восход» дүкеніндегі баға өзінен он қадам жерде тұрған жоғарыда аталған дүкеннен әлдеқайда қымбаттау. Мұнда бірінші сұрыпты жұмыртқа 160 теңге, шай — 230, өсімдік майы — 280 теңге, сүт — 280, күріш — 250 теңге. «Восход» дүкенінің саудагерлері бағаның көтерілуін өз өнімдерін ұсынатын диллерлермен байланыстырады. Мәселен, мұндағы қызанақтың келісі 300 теңге, қияр 200, сәбіз 70 теңге, картоп 80 және сарымсақтың келісі 100 теңгеден саудалануда.
Асан МЫРЗАХАНОВ,
«Семей таңы»
