Астана қаласында бастау алған Қазақ хандығының 550 жылдығына арналған республикалық «Ұлы Дала Елі» тарихи-мәдени экспедициясы 18 қыркүйек күні Павлодар облысынан Семейге келді. Экспедиция мүшелерін Қазақстан халқы Ассамблеясы ШҚО хатшылығының басшысы Еркімбек Аязбаев пен қалалық Достық үйінің директоры Аманғазы Тілеубаев және қалалық этномәдени орталықтарының өкілдері қарсы алды. Одан кейін қалалық Достық үйінде Павлодар облысынан келген экспедиция мүшелері кітап-күнделікті семейліктерге тапсыру рәсімін өткізді.
{jcomments on}«Ұлы Дала Елі» тарихи-мәдени экспедициясының қасиетті Семей жеріндегі ізгілікті сапары қала тұрғындарымен, этномәдени бірлестік өкілдерімен өткізілген «Жер тарихы — ел тарихы» атты дөңгелек үстелмен басталды. Салтанатты жиында Семей қаласы әкімінің орынбасары Надежда Шарова экспедиция мүшелеріне жылы лебізін білдірді.
— Ұлт Жоспары — 100 нақты қадамның негізгі ережелерін тиімді іске асыру мақсатында және 86-87-ші қадамдарға сәйкес, Қазақстан халқы Ассамблеясы мүшелерімен бірлесе отырып, Қазақ хандығының 550 жылдығына арналған «Ұлы Дала Елі» атты республикалық тарихи-мәдени экспедиция ұйымдастырылды. «Жер тарихы — ел тарихы»тақырыбындағы дөңгелек үстел осы республикалық тарихи-мәдени экспедициясы аясында қолға алынған болатын. Экспедицияның мақсаты — еліміздегі ұлттар достастығын, бірлігін және тұрақтылығын паш ету,- деді Н.Шарова.
Ал Қазақстан халқы Ассамблеясы Павлодар облыстық хатшылығының басшысы Сейсенбай Жетпісбаев өз кезегінде қазақ елінің тарихын халыққа танытып, насихаттауда «Ұлы Дала Елі» республикалық тарихи-мәдени экспедициясы атқарған жұмыстың маңызы зор екенін атап өтті.
— Павлодар облысында бастау алған «Ұлы Дала Елі» республикалық тарихи-мәдени экспедициясы аясында біраз жұмыстар атқарылды. Бүгінгі күні барлық шаралардың қорытындысын жасай келе, атқарылған маңызды істерді мына кітап-күнделікке енгізіп отырмыз. Ал маған Семей қаласына келіп, осы күнделікті тапсыру міндеті жүктеліп отыр. Сіздерге де экспедиция аясында нәтижелі жұмыстар атқаруларыңызға тілектеспіз, — деген Сейсенбай Қалижанұлы экспедиция кітап-күнделігін ШҚО Қазақстан халқы Ассамблеясы хатшылығының басшысы Еркімбек Аязбаевқа табыс етті.
Дөңгелек үстел барысында сондай-ақ ШҚО Қазақстан халқы Ассамблеясы хатшылығының басшысы Еркімбек Аязбаев, қалалық Достық үйінің директоры Аманғазы Тілеубаев, шаһардың тарихшы-ғалымдары мен қоғамдық бірлестіктердің өкілдері сөз сөйлеп, қоғамдық келісім мен ұлттық бірліктің қазақстандық үлгісі жайында әңгімеледі.
Дөңгелек үстел аяқталысымен, қатысушылар қаладағы облыстық тарихи-өлкетану мұражайында ұйымдастырылған тақырыптық көрмені тамашалады. Айта кету керек, Қазақ хандығының 550 жылдығына арналған республикалық «Ұлы Дала Елі» тарихи-мәдени экспедициясы аясында Шығыс Қазақстан облысы аумағында 25 қыркүйекке дейін түрлі шаралар ұйымдастырылады. ШҚО-дан кейін экспедицияның кітап-күнделігі Алматы облысына табысталатын болады.
Асан МЫРЗАХАНОВ,
«Семей таңы»
