Өткен сенбі күні Семей қаласының «Спартак» стадионында шаһарымыздың мемлекеттік қызметшілері мен БАҚ өкілдері командалары арасындағы футболдан жолдастық кездесуі өтті. Мемлекеттік қызметшілер командасын Шығыс Қазақстан облысы әкімінің орынбасары Жақсылық Омар мен Семей қаласының әкімі Ермак Сәлімов бастап шықты. Айта кетуіміз керек, БАҚ өкілдері мен мемлекеттік қызметшілер арасындағы жолдастық кездесу дәстүрлі түрде өтіп келеді.
{jcomments on}Жасыл алаңға облыс әкімінің орынбасары Жақсылық Омар мен қала әкімі Ермак Сәлімовтен өзге, қалалық мәслихат хатшысы Бейсенбек Ақжалов, мемлекеттік басқармалар мен бөлімдердің басшылары, депутаттар шықты. Ал қалам ұстаған қауымның командасы құрамына жергілікті телеарналар мен мерзімді баспасөз басылымдарының қызметкерлері кірді.
Жолдастық кездесу қала әкімі Ермак Сәлімовтің бастамасымен өткізілді. Негізгі мақсат жас-тар арасында спортты және дене шынықтыруды насихаттау болып табылады. Сонымен қатар мемлекеттік қызметшілер мен БАҚ өкілдері арасындағы қарым-қатынасты нығайту, қызметкерлердің бірлігін, корпоративтік мәдениет пен ұжымдар арасындағы ұйымшылдықты одан әрі жандандыра түсу. Са-йысқа қатысушыларды ең алдымен Шығыс Қазақстан облысы әкімінің орынбасары Жақсылық Омар құттықтады.
— Құрметті семейліктер және жанкүйерлер! Спорт әр адамның серігі болуы керек. Сондықтан да бүгінгі БАҚ өкілдері мен мемлекеттік қызметшілер арасындағы кездесу қалың бұқараға спортты насихаттаудың бір түрі болып саналады. Өздеріңіз білесіздер, жақында біздің жа-уырыны жерге тимей жүрген балуандарымыз бен қазақ өнерінің жұлдыздары осында бақ сынаған еді. Бүгін, міне, кезекті жолдастық кездесу өткізіліп отыр. Біз осындай шаралар арқылы жастарды спортты серік етуге шақырамыз,- деді облыс әкімінің орынбасары Ж.Омар.
Жалпы, жолдастық кездесу тартысты өтті. Ойынды БАҚ өкілдері белсенді шабуылдармен бастаған болатын. Дегенмен мемлекеттік қызметкерлер де қарап қалмай, қарымта шабуылдар ұйымдастыра білді. Осындай сәттерде Жақсылық Мұқашұлы тарапынан жеткен допқа иелік еткен Әсемхан Досқожанов есеп ашуға мүмкіндік алды. Осылайша, командалар үзіліске 1:0 есебімен тарқасты.
Үзіліс барысында тілшілер қауымына сұхбат берген қала әкімі Ермак Сәлімов пен ШҚО әкімінің орынбасары Жақсылық Омар жастарды салауатты өмір салтына тәрбиелеуде осындай спорттық шаралардың аса қажет екенін атап өтті.
— Салауатты өмір салтын қалыптастыруда спортты, оның ішінде футболды осылайша өзіміз ойнау арқылы насихаттау-ды қолға алдық. Мұндай спорттық ойындар өте қажет. Алдағы уақыттарда спорттың шаңғы, коньки, веложарыс сияқты түрлерін де насихаттайтын боламыз. Ал мұндай шараға жастарды кеңінен тартуымыз керек, — деді қала әкімі Ермак Бидахметұлы.
Облыс әкімінің орынбасары Жақсылық Омардың айтуынша, өңірде, ең алдымен, Мемлекет басшысының тапсырмасына сәйкес, халықтық спорт түрлерін кеңінен насихаттау — күн тәртібіндегі жұмыстардың бірі.
— Атқарушы билік пен бұқара халықтың арасындағы алтын көпір журналистер дейтін болсақ, біз, мемлекеттік қызметкерлер, әрқашан да халықтың ішінде жүрген мамандармен бірге жұмыс істеуіміз керек. Осындай жолдастық кездесулер нәтижелі жұмыстардың негізі әрі бастамасы болады, — дейді Жақсылық Мұқашұлы.
Кездесудің екінші жартысында журналистер командасы өз қақпаларына тағы бір доп өткізіп алды. Жолдастық кездесу 2:0 есебімен мемлекеттік қызмет-шілер командасының жеңісімен аяқталды. Сайыс соңында үздік ойыншылар естелік сыйлықтармен марапатталды.
Асан МЫРЗАХАНОВ,
«Семей таңы»
