«НұрОтан» партиясы Семей қалалық филиалының мәжіліс залында партиялық бақылау комиссиясының кезекті отырысы өтті. Күн тәртібінде мемлекеттік органдардағы ҚР 2007 жылғы 12 қаңтардағы N 221 «Жеке және заңды тұлғалардың өтiнiштерiн қарау тәртiбi туралы» Заңының орындалу барысы туралы және Семей қаласында әлеуметтік маңызы бар азық-түлік бағаларын тұрақтандыру бағытында атқарылып жатқан жұмыстар жайлы екі сұрақ қаралды. Жиынға партиялық бақылау комиссиясының мүшелері, жемқорлыққа қарсы қоғамдық кеңес мүшелері, сондай-ақ қала әкімдігінің дербес бөлім басшылары қатысты.
{jcomments on}Бірінші мәселе, мемлекеттік органдардағы ҚР 2007 жылғы 12 қаңтардағы N 221 «Жеке және заңды тұлғалардың өтiнiштерiн қарау тәртiбi туралы» Заңының орындалу барысы туралы Семей қаласы әкімдігінің құжаттамалық қамтамасыз ету және бақылау бөлімінің басшысы С. Байғалтинова баяндап өтті.
— Қалада жеке және заңды тұлғалардың жазбаша және ауызша өтініштерін қарастыру жұмысы ҚР 2007 жылғы12 қаңтардағы «Жеке және заңды тұлғалардың өтініштерін қарастыру тәртібі туралы» Заңына сәйкес жүзеге асырылады. Аталмыш жұмыстың басты бағыты жеке және заңды тұлғалардың жеке қабылдауын ұйымдастыру, жазбаша және ауызша өтініштерін қарастыру, тұрғындардың шағымдарының туу себептерін анықтау болып табылады. Қала әкімінің аппараты, жергілікті атқарушы органдар, ауылдық округ әкімдері азаматтардың жеке сұрақтары бойынша қабылдауды бекітілген кестелерге сәйкес жүргізеді. Барлық өтініштер бойынша белгіленген мерзімде түсініктер беріліп отырады. Жалпы ағымдағы жылдың 8 айында қала әкімдігіне 2152 арыз шағым келіп түскен. Олардың 1788 жеке тұлғалардан, 364 заңды тұлғалардан, — деп атап өтті Сайран Байғалтинова.
Партиялық бақылау комиссиясының мүшелері аталмыш сұрақ бойынша мемлекеттік қызметкерлерге халықтан келіп түсетін әрбір өтінішті дер кезінде, жан-жақты және толықтай қарау мәселесіне ерекше назар аудару қажеттігіне тоқталды.
Күн тәртібіндегі келесі мәселе қаладағы әлеуметтік маңызы бар азық-түлік бағаларын тұрақтандыру бағытында атқарылып жатқан жұмыстар жайында Семей қаласы кәсіпкерлік бөлімінің басшысы баяндады.
Марат Нүгеровтің айтуынша, қалада бағаны тұрақтандыру мақсатында арнайы штаб құрылған. Осыған орай, азық-түлік, дәрі-дәрмек бағаларының негізсіз көтерілуінің алдын алу мақсатында тәулік бойы арнайы сенім телефондары жұмыс істеуде. Қала тұрғындары бағаның негізсіз көтерілген фактілеріне куә болған жағдайда мына телефон нөмірлеріне хабарласуларына болады: 52-43-92. Сондай-ақ М. Нүгеров бағаны бірқалыпты ұстап тұру өте маңызды екенін, алайда қаладағы барлық сауда нүктелерін тұрақты түрде бақылау мүмкін емес екенін, сондықтан бұл жұмыста сатып алушылардың да көмегі қажеттігін айтты.
Жиын соңында партиялық бақылау комиссия мүшелері мемлекеттік қызметкерлерге аталмыш маңызды мәселелерге жауапкершілікпен қарауға шақырып, айтылған сұрақтардың барлығы партия назарында болатынын айтты.
Дархан ЖҰМАДІЛОВ, «Нұр Отан» партиясы Семей қалалық филиалының қоғамдық қабылдау бөлімінің меңгерушісі.
